އެމެރިކާގައި ކޮވިޑް19 އަށް ޕޮޒިޓިވްވެފައިވާ މީހުންގެ އަދަދު 25 މިލިއަނަށް އަރައިފިއެވެ.
ކޮވިޑް19އަށް ޕޮޒިޓިވް ވެފައިވާ މީހުންގެ އަދަދު އެމެރިކާގައި 25 މިލިއަނަށް އަރާފައިވާއިރު، އެގައުމުގެ އަލަށް ހުވާކުރި ރައީސް ޖޯބައިޑްން ގެންދަވަނީ ޓްރަމްޕްގެ ދައުރުގައި ކޯވިޑް19 ކޮންޓްރޯލް ކުރުމަށް އެޅުއްވި ފިޔަވަޅުތަކަށް ބޮޑެތި ބަދަލުތަކެއް ގެންނަމުންނެވެ. މިގޮތުން ގެނެސްފައިވާ އެންމެ ބޮޑު ބަދަލަކީ ބައިޑްންގެ ސރުކާރުގެ ފުރަތަމަ 100 ދުވަހު މާސްކް އަޅައިގެން އުޅުމަށް ސަރުކާރުން ގޮވާލައްވާފައި ވުމެވެ. އަދި ސަރުކަރުގެ ހުރިހާ އޮފީސްތަކެއްގައި މަސައްކަތްކުރާއިރު މާސްކް އެޅުންވެސް ބައިޑްންވަނީ މަޖުބޫރު ކުރައްވާފައެވެ.
ޖޯން ހޮޕްކިންސް ޔުނިވަރސިޓީން އާންމު ކޮށްފައިވާ ހިސާބުތަކަށް ބަލާއިރު، ދުނިޔޭގައި އެންމެ ގިނައަދަދަކަށް ކޮވިޑަށް ޕޮޒިޓިވް ވެފައިވާ މީހުންގެ އެމެރިކާގައި ތިބިއިރު، މުޅި ދުނިޔޭގެ ކޮވިޑަށް ޕޮޒިޓިވް ވެފައިވާ މީހުންގެ 1/4 މީހުންވެސް ތިބީ އެމެރިކާގައެވެ.
ކޯވިޑް19އަށް ޕޮޒިޓިވް ވެފައިވާ މީހުންގެ އަދަދު އެމެރިކާގައި 25 މިލިއަނަށް އަރާފައިވާއިރު، ވެކްސިން ފޯރުކޮށްދިނުމަށް އެމެރިކާގައި ކުރިޔަށް ގެންދިޔަ ޕްރޮގްރާމު އެކަށީގެންވާ ގޮތެއްގައި ކުރިޔަށް ގެންދެވިފައިވާ ނުވާކަމަށް ރައީސް ބައިޑްންގެ ޗީފް އޮފް ސްޓާފު ވަނީ ވިދާޅުވެފައެވެ. މިގޮތުން މި ޕްރޮގްރާމްގެ ދަށުން އަދިވެސް އެމެރިކާގެ ބައެއް ހިސާބުތަކަށް ވެކްސިން ފޯރުކޮށްދެވިފައެއް ނުވެއެވެ.
ޓްރަމްޕްގެ ސަރުކާރުން ކުރިޔަށް ގެންދިޔަ ވެކްސިންގެ ޕްރޮގްރާމަށް ބައިޑްންގެ ސަރުކާރުން ވަރަށް ބޮޑަށް ފާޑު ކިޔާފައިވައިރު، އެމެރިކާގައި މިހާތަނަށް ވަނީ މިބަލީގައި 417،000 އަށްވުރެ ގިނަ މީހުން ވަނީ މަރުވެފައެވެ. ދުނިޔެއިން މިބަލީގައި އެންމެ ގިނަ އަދަދެއްގެ މީހުން މަރުވެފައިވަނީ ވެސް އެމެރިކާގައެވެ.
އެމެރިކާގެ ސެންޓަރ ފޮރ ޑިސީސް ކޮންޓްރޯލް އެންޑް ޕްރިވެންޝަން (CDC)އިން ބުނެފައިވާ ގޮތުގައި، އެމެރިކާގެ އެކި ސަރަހައްދުތަކަށް ފޯރުކޮށްދެވިފައިވާ ޖުމްލަ 41.4 މިލިއަން ވެކްސިންތަކުގެ ތެރެއިން މިހާތަނަށް ބޭނުންކުރެވިފައިވަނީ ދެބައިކޮށްފަ އެއްބަޔަށްވުރެވެސް މަދު އަދަދެއްގެ ވެކްސިނެވެ.
ޓްރަމްޕްގެ ސަރުކާރުގައި މައި ސަރުކާރުން ވެކްސިން ފޯރުކޮށްދީފައިވަނީ ސްޓޭޓްތަކުގެ އާބާދީއަށް ބަލައިގެންނެވެ. ނަތީޖާއެއްގެ ގޮތުން ވެކްސިންގެ ބޮޑުބައެއް ރައްޔިތުންނާ ހަމައަށް ފޯރުކޮށްދިނުމުގެ ޒިންމާގެ ބޮޑުބައެއް ހަވާލުކުރެވިފައި އޮތީ ސްޓޭޓްތަކުގެ ސަރުކާރުތަކާއެވެ.
އެމެރިކާގެ ގައިންގަޔަށް އަރާ ބައލިތަކާބެހޭ ޚާއްސަ ތަޖުރިބާކާރު، އަދި ޓްރަމްޕްގެ ވެރިކަމުގައިވެސް، ކޯވިޑް19 ޓާސްކް ފޯހުގައި އިންނެވި، އެންތަނީ ފައުޗީ ވިދާޅުވެފައިވަނީ، ކުރީގެ ސަރުކާރުގައި، ވެކްސިން ފޯރުކޮށްދިނުމުގެ ޒިންމާގެ ބޮޑުބައި ސްޓޭޓްތަކުގެ ސަރުކާރުތަކާ ހަވާލުކުރެވިފައި އޮތުމަކީ އެންމެ ރަގަޅަށް އެކުލަވާލެވިފައި އޮތް އުސޫލެއް ނޫނެވެ.
ކޯވިޑް19 އާއި ދެކޮޅަށް ވަރުގަދައަށް ހަގުރާމަ ކުރައްވާނެކަމުގެ ވައުދާއެކީ ވެރިކަމަށް ވަޑައިގެންނެވި ބައިޑްންވަނީ، އޭނާގެ ސަރުކާރުގެ ފުރަތަމަ 100 ދުވަހުގެ ތެރޭގައި 100 މިލިއަން އެމެރިކާ ރައްޔިތުންނަށް ވެކްސިން ފޯރުކޮށްދޭނެކަމަށް ވައުދު ވެފައެވެ. އެހެންނަމަވެސް، ބައެއް ފަރާތްތަކުންވަނީ، މިއީ އެކަށީގެންވާ ވަރަށްވުރެ މަދު އަދަދެއްކަމަށް ބުނެ ބައިޑްންގެ މި ވައުދަށް ފާޑު ކިޔާފައެވެ.
