އެކްޓަރު ވަރުން ދަވަން އާއި ނަތާޝާ ދަލާލްގެ ކައިވެނީގެ ހަފްލާގައި ފޯނު ބޭނުމެއް ނުކުރެވޭނެކަމަށް ނަތާޝާ ދަލާލް ބުނެފިއެވެ. ނަތާޝާ ބުނިގޮތުގައި ސަބަބަކީ އޭނާއާއި ވަރުންގެ ކައިވެނީގެ ފޮޓޯތައް ސޯޝަލްމީޑިއާގައި ލީކުވާން ބޭނުންނުވާތީކަމަށެވެ.
ވަރުން އާއި ނަތާޝާގެ ކައިވެނީ މިއަދު އަލީބާގްގައި ބާއްވާއިރު، އެދެމީހުންގެ އާއިލާވެސް މިހާރު ވަނީ އަލީބާގް އަށް ގޮސްފައެވެ.
އެންމެ ފަހުގެ ހަބަރުތައް ބުނާގޮތުގައި އަލީބާގްގެ ދަ މޭންޝަން ހައުސްއަށް އެއްވެސް ކަހަލަ ފޯނެއް އަދި ކެމެރާއެއް އެތެރެކުރުން މަނާކުރެވިފައި ވާކަމަށާއި މިހާރު އެތާގައި މަސައްކަތްކުރަމުންދާ ސްޓާފުންގެ ފޯނުތައްވެސް ވަނީ ސީލްކޮށްފަ އެވެ. އެއީ ނަތާޝާގެ ސްޓްރިކްޓް އޯޑަރެއްކަމަށްވެސް ޚަބަރުތައް ބުނެއެވެ.
ނަމަވެސް ނަތާޝާގެ ބައެއް ފޮޓޯ އިއްޔެ ޕަޕަރާޒީންނަށް ލިބިފައިވާއިރު، ފޭނުންނަށް އެދެމީހުންގެ ކައިވެނީގެ އެއްވެސް ހަފްލާއެއްގެ ފޮޓޯއެއް ފެނިގެންނުދާނެ ކަމާމެދު އެތަށް ފޭނުންނެއް ވަނީ ކަންބޮޑުވުން ފާޅުކޮށްފައެވެ.
ވަރުން ދަވަން ވަނީ 2021 ގައި ކޮވިޑުގެ ކަންތައް ހަމައަކަށްއެޅުމުން އޭނާއާއި ނަތާޝާ ކައިވެނިކުރާނެކަމަށް ބުނެފައެވެ. މިހާރުވެސް ކޮވިޑުގެ ކޭސްތައް ފެންނަމުން ދިއުމުން އެދެމީހުންގެ ކައިވެނީގައިވެސް ސަރުކާރުގެ ގަވައިދުތަކަށް ބަލާނެއެވެ. އެގޮތުން އަންނަ މެހެމާނުން ކޮވިޑު ޓެސްޓުގެ ނަތީޖާ ދެއްކުމާއި މާސްކު އެޅުން ހިމެނެއެވެ. އަދި ހަފްލާގައި ބައިވެރި ވެވެނީވެސް މަދު އަދަދެއްގެ މެހެމާނުންނަށެވެ.
