މުޅި ދުނިޔޭގައިވެސް ބާރު މިނުގައި ފެތުރެމުންދާ ކޯވިޑް19ގައި މީހުން މަރުވަމުންދާ ނިސްބަތް އެންމެ މަތީ ގައުމަކީ އިގިރޭސިވިލާތްކަމަށް، މިސިއްޙީ ކާރިސާއާއި ގުޅޭ ރަސްމީ މައުލޫމާތު އާންމު ކުރަމުންދާ، އެމެރިކާ ޖޯން ހޮޕްކިންސް ޔުނިވާރސިޓީން އެންމެ ފަހުން އާންމުކޮށްފައިވާ ތަފާސް ހިސާބުތަކުން ދައްކައިފިއެވެ.
މި ޔުނިވަރސިޓީން އާންމު ކޮށްފައިވާ ހިސާބުތަކަށް ބަލާއިރު، ކޮންމެ 100،000 މީހުންގެ އާބާދީއަކަށް މީހުން މަރުވާ ނިސްބަތަށް ބަލާއިރު، މީހުން މަރުވާ ރޭޓް އެންމެ މަތީގައި އުޅެނީ އިގިރޭސިވިލާތުގައެވެ.
ކޯވިޑް19ގައި މީހުން މަރުވަމުންދާ ނިސްބަތް އެންމެ މަތީގައުމެއްގެ ގޮތުގައި އިގިރޭސިވިލާތް ފާހަގަ ކުރެވިފައިވާއިރު، އެގައުމުގައި މިހާތަނަށް މިބަލީގައި އެއްދުވަހެއްގައި އެންމެ ގިނަ އަދަދަކަށް މީހުން މަރުވެފައިވަނީ ފާއިތުވެދިޔަ ހަފްތާގެ ބުދަ ދުވަހުއެވެ. އެދުވަހު އެކަނިވެސް އިގިރޭސިވިލާތުގައި ކޯވިޑް19ގައި 1،820 މީހުން މަރުވެފައި ވެއެވެ. އަދި ފާއިތުވެދިޔަ 7 ދުވަހަށް ބަލާއިރު، އެވްރެޖްކޮށް ދުވާކަށް އިގިރޭސިވިލާތުގައި 1،240 މީހުން މިބަލީގައި ވަނީ މަރުވެފައެވެ.
އެހެންނަމަވެސް، ޖޯން ހޮޕްކިންސް ޔުނިވަރސިޓީން ހާމަކޮށްފައިވާ ގޮތުގައި، ކޯވިޑް19ގައި އެއްގައުމު އަނެއް ގައުމު އަޅާކިޔާފަ ނެރެމުންދާ ތަފާސްހިސާބުތަކުގައި ތަފާތުތަކެއް ހުރެދާނެއެވެ. ސަބަބަކީ، މިހިސާބުތައް ހަމައެކަނި ބިނާވެގެންދަނީ ގައުމުތަކުން ފޯރުކޮސްދޭ ރަސްމީ ހިސާބުތަކުގެ މައްޗަށް ކަމަށް ވާތީއެވެ.
އެހެންނަމަވެސް، 66 މިލިއަން މީހުންގެ އާބާދީއެއް އޮންނަ އިގިރޭސިވިލާތުގައި، ބޮލަކަށް ޖެހޭ ނިސްބަތުގެ، (ޕާ ކެޕިޓާ) ހިސާބުތަކަށް ބަލާއިރު، އެމެރިކާފަދަ، ކޯވިޑްގެ ހާލަތު އެންމެ ގޯސް ބައެއް ގައުމުތަކަށްވުރެ މީހުން މަރުވާ ނިސްބަތް އިގިރޭސިވިލާތުގައި އުޅެނީ މާމަތީގައެވެ.
ސިއްޙީ ކާރިސާ ފެށުނުފަހުން، އިގިރޭސިވިލާތުގައި މިހާތަނަށް މިބަލީގައި 96،166 މީހުންވަނީ މަރުވެފައެވެ.
ބޮލަކަށް ޖެހޭ ނިސްބަތުން (ޕާ ކެޕިޓާ) މީހުން މަރުވާ ނިސްބަތް އެންމެ މަތީ ގައުމުތައް
1. އިގިރޭސިވިލާތް: 142.53
2. ޗެޒް ރިޕަބްލިކް: 140.91
3. އިޓަލީ: 139.34
4. އެމެރިކާ: 125.35
5. ސްޕެއިން: 117.80
އިގިރޭސިވިލާތުގެ ބޮޑުވަޒީރު ބޮރިސް ޖޯންސަން ވިދާޅުވެފައިވަނީ، މިހާރު އަޅާފައި ހުރިފިޔަވަޅުތައް އާދައިގެ ހާލަތަކަށް އިއާދަކުރެވޭ ވަރަށްވުރެ، މީހުން މަރުވާ ނިސްބަތް އަދިވެސް އެގައުމުގައި އުޅެނީ މާމަތީގައެވެ.
ފާއިތުވި ޑިސެމްބަރ މަހުންފެށިގެން ދުނިޔޭގެ އެކި ގައުމުތަކުގައި، ކޯވިޑް19 އާއި ދެކޮޅަށް ވެކްސިންތައް ދޭން ފަށާފައިވި ނަމަވެސް، އަދިވެސް ކޯވިޑް19 ދަނީ ވެކްސިން ދެމުންދާ ގައުމުތަކުގައިވެސް ބާރު މިނުގައި ފެތުރެމުންނެވެ. އެހެންނަމަވެސް ދުނިޔޭގެ ބޮޑެތި ގައުމުތަކުން މިހާރު އަމާޒު ހިފާފައިވަނީ، އަހަރުގެ ފުރަތަމަ 6 މަސް ދުވަހުގެ ތެރޭގައި އެގައުމުތަކުގެ އާބާދީގެ ބޮޑު ބަޔަކަށް ވެކްސިން ދީ ނިންމުމަށެވެ. ޖަޕާނުންވަނީ އަހަރުގެ ފުރަތަމަ 6 މަސްދުވަހުގެ ތެރޭގައި އާބާދީގެ ބޮޑު ބަޔަކަށް ވެކްސިން ދީ ނިންމުމަށް ޕްލޭން ކޮށްފައެވެ.
މިގޮތުން އެމެރިކާގެ ސީޑީސީގެ އެންމެ އިސްފަރާތް ކަމުގައިވާ އެންތަނީ ފައުޗީ ވިދާޅުވެފައިވާ ގޮތުގައި، އެގައުމުގެ ދެން އަންނަން އޮތް ހޫނު މޫސުމް ނިމުމުގެ ކުރިން، ބޮޑެތި މީހުންގެ އާބާދީގެ %85 މީހުންނަށް ވެކްސިން ދީ ނިންމަން ޖެހޭނެއެވެ.
