މުޅި ދުނިޔެއަށް ކުރިމަތިވި ކޯވިޑް-19 ވަބާގެ ސީދާ އަސަރު އެންމެ ބޮޑަށް ކުރި ގައުމުތަކުގެ ތެރޭ ދިވެހިރާއްޖެ ހިމެނެއެވެ. ރާއްޖޭގެ މުޅި އިޤްތިސާދު އެކަމަކަށް ބަރޯސާވެފައި އޮންނަ ފަތުރުވެރިކަން މުޅިން ހުއްޓާލަން ޖެހުމާއި، އިމްޕޯޓް އެކްސްޕޯޓަށް ދަތިތައް ކުރިމަތިވުމުން ރާއްޖެއަށް ވަންނަ ބޭރުފައިސާގެ އަދަދު މަދުވެ، ގިނަ ބައެއްގެ ވަޒީފާތަށް ނާޒުކު ފައްތަރަކަށް ދިޔައެވެ. ވަޒީފާގެ ބާޒާރުގެ ބޮޑު އިންސައްތައަކާއި ގައުމަށް ވަންނަ ބޭރުފައިސާގެ ދޮރު އެއްކޮށް ބަންދުކޮށްލަން ޖެހުމުން ވާނީވެސް އެހެންތާއެވެ.

ފަތުރުވެރިކަމުގެ ސިނާޢަތުން، ކުރިން އަންދާޒާ ކުރި ގޮތުން ނަމަ މިދިޔަ 2020 ވަނަ އަހަރަކީ ރާއްޖެއިން ރެކޯޑް މިންވަރަކަށް ފަތުރުވެރިކަން ކުރިއަށް ޖައްސާލާނެ އަހަރެކެވެ. 2019 ވަނަ އަހަރު 1.5 މިލިއަން ފަތުރުވެރިންނަށް މަރުހަބާ ކިއުމަށްފަހު މިދިޔަ އަހަރު މުޅި ސިނާޢަތް ފޫގަޅާލީ 2 މިލިއަނަށްވުރެ ގިނަ ފަތުރުވެރިން ރާއްޖެ ގެނައުމަށެވެ. ނަމަވެސް ކަން ދިމާކުރިގޮތުން 5 ލައްކަ ފަތުވެރިނުން އަހަރު ނިންމާލަން ޖެހުނީއެވެ.

ކޯވިޑްގެ ބަލިމަޑުކަމުގެ ކުރިން ރާއްޖެއަށް އެންމެ ގިނައިން އެއްގައުމަކުން ފަތުރުވެރިން އައީ ޗައިނާ އިންނެވެ. ނަމަވެސް ޗައިނާ މާކެޓް އަބަދުވެސް ބެލެވިފައި އޮތީ މެދު ފަންތީގެ ނޫނީ ދަށު ފަންތީގެ ފަތުރުވެރިން ގިނަ މާކެޓެއްގެ ގޮތުގައެވެ.

ރާއްޖެއަށް އެންމެ ގިނައިން މަތީ ފަންތީގެ ފަތުރުވެރިން އަބަދުވެސް އަންނަމުން ދިޔައީ ޔޫރަޕާއި ރަޝިޔާ މާކެޓުންނެވެ. ކޯވިޑްގެ ބަލިމަޑުކަމަށްފަހު ރާއްޖެ ފަތުރުވެރިކަމަށް ހުޅުވާލުމުން އެންމެ ފާހަގަކޮށްލެވުނު އެއްކަމަކީ ރާއްޖެއަންނަ ދަށު ފަންތީގެ ފަތުރުވެރިންގެ އަދަދު ދައްވެ މެދުފަންތިއާއި މަތީފަންތީގެ ފަތުރުވެރިން ނިސްބަތުން އިތުރުވުމެވެ. މިއީ ޔަގީނުންވެސް ގައުމުގެ އިޤްތިސާދު ހަމައަކަށް އަޅުވައި ގައުމުގެ އާމްދަނީ އިތުރުކުރަން ޖެހޭ މި ދަނޑިވަޅުގައި ހެޔޮ ފާލަކަށް ނޫނީ ނުވާނެއެވެ.

ތަފާސް ހިސާބުތަކުގައި ވާ އަދަދުތަކުން ނުވަތަ އިންސައްތަ ތަކުން ބަލާއިރު ރާއްޖެއަށް ފަތުރުވެރިން އަންނަ މާކެޓްތަކުގެ ތެރެއިން މިދިޔަ އަހަރުގެ ފުރަތަމަ 20 ދުވަހާއި އަޅާކިޔާލާއިރު މިއަހަރުގެ ފުތަރަމަ 20 ދުވަހު އެންމެ ބޮޑު ކުރިއެރުމެއް ހޯދާފައިވަނީ ޔޫކްރައިނާއި ކަޒަކިސްތާން މާކެޓެވެ. 2 އަހަރުގެ މިމުއްދަތު އަޅާކިޔާއިރު ޔޫކްރައިން މާކެޓުން މިއަހަރު ވަނީ 173.1 އިންސައްތައިގެ ކުރިއެރުމެއް ހޯދާފައެވެ. އަދި ކަޒަކިސްތާން މާކެޓުން 130.4 އިންސައްތައިގެ ކުރިއެރުމެއް ވަނީ ހޯދާފައެވެ.

މި 2 މާކެޓުން ފަތުރުވެރިން ރާއްޖެއަށް ޒިޔާރަތްކުރި އަދަދަށް ބަލާއިރު ޔޫކްރައިނުން މިއަހަރުގެ ފުރަތަމަ 20 ދުވަހު ރާއްޖެއަށް 5،020 ފަތުރުވެރިން އައިސްފައި ވެއެވެ. ނަމަވެސް މިދިޔަ އަހަރު މި މުއްދަތުގައި އައީ އެންމެ 1،838 ޔޫކްރައިން ފަތުރުވެރިންނެވެ. އަދި ކަޒަކިސްތާނުން މިއަހަރު ފުރަތަމަ 20 ދުވަހު ރާއްޖެއަށް 3،023 ފަތުރުވެރިން ވަނީ އައިސްފައެވެ. މިދިޔަ އަހަރު ރާއްޖެއަށް އައީ އެގައުމަށް ނިސްބަތްވާ 1،312 ފަތުރުވެރިން ނެވެ.

މި އަހަރު މިހާތަނަށް ރާއްޖެއަށް އެންމެ ގިނަ އަދަދަކަށް ފަތުރުވެރިން އައި ގައުމަކަށް ރަޝިޔާ އާއި އިންޑިއާ ވެފައި ވާއިރު، އެންމެ ގިނަ އަދަދަކަށް ފަތުރުވެރިން އަންނަ ސަރަހައްދެއްގެ ގޮތުގަައި ފާހަގަ ވަނީ މެދުތެރޭގެ ޔޫރަޕާއި އިރުމަތީ ޔޫރަޕެވެ.

ރާއްޖޭގެ ފަތުރުވެރިކަމުގެ މާކެޓްތަކަށް ބަދަލުއައި މައިގަނޑު ސަބަބުތަކުގެތެރޭ ރާއްޖެގެ ފަތުރުވެރިކަން އިޝްތިހާރު ކުރުމަށް ކުރެވޭ މަަސައްކަތްތަކަށް އައިސްފައިވާ ބަދަލު ތަކާއި، ރާއްޖެއަށް މި ފަހުގެ ތާރީހުގައި ލިބިފައިވާ ދުނިޔޭގެ ފެންވަރުގެ އެވޯޑްތައް ފާހަގަކޮށްލެވެ އެވެ. މީގެ އިތުރުން ރާއްޖޭގައި ޒަމާނުއްސުރެ އޮންނަ، އެކަހެރި ރަށްރަށުގައި ޓޫރިސްޓް ރިސޯޓްތައް ހިންގުމުގެ އުސޫލަކީ، މިފަދަ ސިއްހީ ޕެންޑަމިކެއްގައި ޗުއްޓީ ހޭދަކުރުމަށް އެންމެ ރައްކާތެރިި ގޮތްކަމަށް ގިނަ ފަތުރުވެރިންނާއި ޓުއަރ އޮޕަރޭޓަރުން ދެކެއެވެ.

ޓޫރިޒަމް މިނިސްޓްރީން ލަފާކޮށްފައިވަނީ މި އަހަރު 1.5 މިލިއަން ޓޫރިސްޓުން ރާއްޖެ ގެނެވޭނެ ކަމަށެވެ. މީގެ އިތުރުން 2021 ވަނަ އަހަރު ނިމުމާއެކު ރާއްޖެއިން ކުރިމަތިލާނީ ފަތުރުވެރިކަމުގެ ރަންޔޫބީލް އަހަރާއެވެ. ރާއްޖޭގެ ފަތުރުވެރިކަމުގެ ސިނާއަތަށް 50 އަހަރު ފުރޭނީ އަންނަ 2022 ވަނަ އަހަރުއެވެ.