އެއްފަރާތް އަނެއްފަރާތަށް ހަމަލާދެމުންދާ ކަމުގެ ތުހުމަތާއިއެކު، ރަޝިޔާއިން އިސްވެ އޮވެ އާޒަރުބައިޖާނާއި އަރުމީނިއާއާއި ދެމެދު ގާއިމް ކޮށްފައިވާ ސުލްހައިގެ އެއްބަސްވުން ކާމިޔާބު ވެދާނެ ކަމުގެ އުއްމީދު ކުޑަވެއްޖެއެވެ.
މެދުކެޑުމެއް ނެތި 10 ގަޑިއިރުވަންދެން ރަޝިޔާގެ ވެރިރަށް މޮސްކޯގަ މިދެގައުމުގެ ޚާރުޖީ ވަޒީރުންގެ މެދުގައި ކުރެވުނު މަޝްވަރާތަކަށްފަހު، ދެފަރާތުންވެސް އެއްބަސް ވެފައިވަނީ، ކަރުބާޚުގައި ތިބި އަރިމީނިއާ ދަރިކޮޅުގެ ހަގުރާމަވެރިންނާއި އަދި އާޒަރުބައިޖާންގެ ސިފައިން ހައްޔަރު ކޮށްފައިވާ ހަގުރާމައިގެ އަސީރުންނާއި އަދި ދެފަރާތުގައި މަރުވެފައިވާ މީހުން ރެޑްކްރޮސްގެ ބެލުމުގެ ދަށުން ބަދަލުކުރުމަށްޓަކާ ހަގުރާމަ މެދުކަޑާލުމަށެވެ.
މި ދެގައުމުގެ ދެމެދުގައި މިބޭއްވުނު ސުލްހައިގެ ވާހަކަތަކަކީ، ވޭތުވެދިޔަ ސެޕްޓެމްބަރމަހު 27 ވަނަ ދުވަހު، އާރަޒުބައިޖާންގެ ކަރުބާޚުގެ މައްސަލާގައި ހަގުރާމަ ފެށުމަށްފަހު ކުރިޔަށް ގެންދެވުނު ސުލްޙައިގެ ފުރަތަމަ ވާހަކަތަކެވެ. ދެ ފަހްތާއަށްވުރެ ގިނަދުވަސްވެފައިވާ މިހަގުރާމައިގައި މިހާތަނަށް އައިއިރު އެތައްސަތޭކަ ބަޔަކު ވަނީ މަރުވެފައެވެ. އަދި ހަގުރާމަ ހިނގަމުންދާ ސަރަހައްދުތަކުގައި އިންސާނީ އެހީތެރިކަމަށް ބޭނުންވެފައިވާ އެތައްސަތޭކަ ބަޔަކު އެބަތިއްބެވެ.
ނަގޯނޯ ކަރުބާޚްއަކީ ބައިނަލްއަގުވާމީ ގޮތުން އާޒަރުބައިޖާނަށް ނިސްބަތްވާ ސަރަހައްދެކެވެ. އެހެންނަމަވެސް މިސަރައްހައްދުގައި ދިރުއުޅެމުންދަނީ އަރުމީނިޔާ ދަރިކޮޅުގެ ރައްޔިތުންނެވެ. ބައިނަލްއަގުވާމީގޮތުން މިސަރަހައްދަކީ އާޒަރުބައިޖާނުގެ ސަރަހައްދެއްކަމުގައި ބަލައިގެންފައިވި ނަމަވެސް މިސަރަހައްދުގައި އަމިއްލަވަންތަ ވެރިކަމެއް ކުރަމުންދަނީ މިސަރަހައްދުގައި ދިރިއުޅެމުންދާ އަރުމީނިޔާ ދަރިކޮޅަށް ނިސްބަތްވާ މީހުންނެވެ.
