މިސަރުކާރުގެ ފާއިތުވެދިޔަ ދެ އަހަރުގެ ތެރޭގައި ރައީސް ޔާމީންގެ ވެރިކަމުގެ ފަސް އަހަރުގެ ތެރޭގައި ނުހިނގާހާ ގިނަ މަޝްރޫޢު ހިންގިފައިވާކަމަށް ރައްޔިތުންގެ މަޖިލީހުގެ ބާރަށު ދާއިރާގެ މެމްބަރު އަހުމަދު އަބްދުﷲ ވިދާޅުވެއްޖެއެވެ.
ރައްޔިތުންގެ މަޖިލީހުން ކުރިއަށް ގެންދާ ކައުންސިލް އިންތިޚާބުގެ ޤާނޫނަށް ބަދަލު ގެނައުމަށް ކޮމިޓީ މަރުހަލާއިން އެކުލަވާލި ރިޕޯޓުގެ ބަހުސް މަރުހަލާގައި ވާހަކަ ދައްކަވަމުން އަހުމަދު އަބްދުﷲ ވިދާޅުވީ އިދިކޮޅު ފަރާތްތަކުން މިއަދު ކިތަންމެ ވާހަކަ ދެއްކެވިޔަސް އަތޮޅު ތެރޭގައި ފާއިތުވެދިޔަ ދެ އަހަރުގެ ތެރޭގައި ރައީސް ޔާމީންގެ ވެރިކަމުގެ ފަސް އަހަރު ދުވަހު ނުކުރެވޭހާ ގިނަ މަސައްކަތް ކޮށްފައިވާކަމަށެވެ.
އިދިކޮޅު ފަރާތްތަކުން އިންތިޚާބާއި ގުޅޭގޮތުން ދައްކާ ވާހަތަކަށް ރައްދު ދެެއްވަމުން އަހުމަދު ވިދާޅުވީ ރައީސް ޔާމީންގެ ވެރިކަމުގައި އޭރުގެ އިދިކޮޅު ފަރާތެއްގެ ގޮތުގައި އޮތް އެމްޑީޕީއަށް އިންތިޚާބެއްގައި ކެންޕެއިންކޮށް، މިނިވަންކަމާއިއެކު މަސައްކަތް ކުރުމަށް ޖާގަ ދީފައި ނުވާކަމަށެވެ. ނަމަވެސް މިސަރުކާރުން މިދަނީ ކޯވިޑްގެ މިހާލަތުގައިވެސް އިދިކޮޅު ފަރާތްތަކަށް ބޭނުންގޮތަކަށް ކެންޕެއިން ހަރަކާތް ހިންގައި، ޖަލްސާ ބާއްވައި، މަގުމަތީގެ ހަރަކާތްތައް ހިންގަމުންވެސް ޖާގަ ދެމުންކަމަށެވެ.
އަޅުގަނޑުމެން ދެކުނިން އިއްޔެވެސް މަޖިލީދީ މަގުގައި އިދިކޮޅު ކެންޕެއިން ހަރަކާތެއް ދަނިކޮށް، އެބޭފުޅުން ކެންޕެއިން ޖަލްސާތައްވެސް އެބަވާއްވާ. އެކަމު ނިކަން ބައްލަވާ އަޅުގަނޑުމެން އިދިކޮޅުގައި ތިބިއިރު މިފުރުސަތު ލިބުނުތޯ؟ މިއަދު މިނިވަންކަމާއިއެކު އިދިކޮޅު ފަރާތްތަކަށް ބޭނުން ކޮންމެ ކަމެއް ކުރުމަށް ވަީ ފުރުސަތު ދެވިފަ.
– އަހުމަދު ވިދާޅުވިއެވެ.
އަހުމަދު ވިދާޅުވީ ކޮންމެ ހާލަތެއްގައި އިންތިޚާބު ބޭއްވިޔަސް މި އިންތިޚާބު ބޮޑުތަނުން އެމްޑީޕީން ކާމިޔާބު ކުރާނެކަމަށެވެ. ރާއްޖޭގެ ރައްޔިތުންނަށް ކޯވިޑްގެ ދަތިކަމާއިއެކުގައިވެސް ސަރުކާކާރުން ކޮށްދޭ ކަންތައްތަކާއި، ކުރަމުންދާ މަސައްކަތް ބަލައިގަނެ ޝުކުރު ވެރިވާކަމަށެވެ. އަދި މިއަދު ރައްޔިތުން މާޒީއަށް އެބުރި ދާން ބޭނުންނުވާކަމަށް އަހުމަދު ވިދާޅުވިއެވެ.
ކޮމެންޓު ފޮނުވާ