ހުޅުމާލޭގެ އެޕާޓްމަންޓެއްގައި އަލިފާން ރޯވެ ދެ މީހަކަށް ހޮސްޕިޓަލުގައި ފަރުވާދޭން ފަށައިފި

ހުޅުމާލޭ ފޭސް 1 ގެ ފްލެޓެއްގައި ރޭ ދަންވަރު ހިނގި އަލިފާނުގެ ހާދިސާއަކާ ގުޅިގެން ދެ މީހަކަށް ހޮސްޕިޓަލުގައި ފަރުވާދޭން ފަށައިފިއެވެ.

ރޭ 01:07 ހާއިރު ފުލުހުންނަށް އަދި 01:10 ހާއިރު އެމްއެންޑީއެފްއަށް ރިޕޯޓުކުރެވުނު މި ހާދިސާ ހިނގާފައިވަނީ 110 ވަނަ ފްލެޓްގެ ގްރައުންޑް ފްލޯގައި ހުރި އެޕާޓްމަންޓެއްގައެވެ. ފަޔަރ ފައިޓަރުންނާއި، ފުލުހުން އަދި އާންމު ރައްޔިތުން ގުޅިގެން ކުރި އަވަސް މަސައްކަތުން މި އަލިފާންގަނޑު އެއްކޮށް ނިއްވާލެވިފައިވަނީ 01:23 ހާއިރުއެވެ.

މި ހާދިސާގައި ދުމުގެ އަސަރުކޮށްގެންނާއި އެކިވަރުގެ އަނިޔާލިބިގެން ޖުމްލަ ފަސް މީހަކު ހޮސްޕިޓަލަށް ގެންދެވުނެވެ. އޭގެ ތެރޭގައި ތިން ބޮޑެތި މީހުންނާއި ދެ ކުޑަކުދިން ހިމެނޭއިރު، މިހާރު ހުޅުމާލޭ ހޮސްޕިޓަލުގައި ފަރުވާދެމުން އަންނަނީ އަތް ފިހުނު ފިރިހެނަކަށާއި ދުމުގެ ސަބަބުން ނޭވާލާން އުނދަގޫވި ފިރިހެނަކަށެވެ.

މި ހާދިސާގެ ސަބަބުން ހާލުގައި ޖެހުނު އާއިލާތަކަށް ބޭނުންވާ ވަގުތީ ބޯހިޔާވަހިކަމާއި އެނޫންވެސް ޒަރޫރީ އެހީތެރިކަން ފޯރުކޮށްދިނުމުގެ މަސައްކަތް ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީ (އެންޑީއެމްއޭ) އިން މިހާރު އަންނަނީ ކުރަމުންނެވެ. އަދި އެޕާޓްމަންޓުގައި އަލިފާން ރޯވާން މެދުވެރިވި ސަބަބު ފުލުހުން ދަނީ އިތުރަށް ތަހުގީގު ކުރަމުންނެވެ.