ފްރެންޗް އޯޕަން ޓެނިސް މުބާރާތް ކާމިޔާބުކޮށް ޓެނިސް ލެޖެންޑް ރޮޖާ ފެޑެރާގެ ރިކޯޑާ ރަފައެލް ނަޑާލް ހަމަކޮށްފިއެވެ.
ރޭ ކުޅުނު މުބާރާތުގެ ފައިނަލް މެޗުން ނަޑާލް މޮޅުވީ ޖޮކޮވިޗް ވާދަކޮށް ސީދާ ތިން ސެޓުންނެވެ. މެޗުގެ ފުރަތަމަ ދެ ސެ ޓު ނަޑާލް ކާމިޔާބުކުރީ 6-0 އަދި 6-2 ންނެވެ.
މެޗުގެ ތިންވަނަ ސެޓުގައި ވާދަވެރިކޮށް ދިޔަ ނަމަވެސް ނަޑާލް 7-5 ން ކާމިޔާބުކޮށް މުބާރާތުގެ ޗެމްޕިއަންކަން ވަނީ ހޯދާފައެވެ.
މިއީ ނަޑާލް މި މުބާރާތް ކާމިޔާބު ކުރި 13 ވަނަ ފަހަރެވެ. އަދި މިއީ ނަޑާލް މި މުބާރާތުގެ ފައިނަލުގައި ޖޮކޮވިޗް ބަލިކުރި ތިންވަނަ ފަހަރެވެ. މީގެ ކުރިން ނަޑާލް ވަނީ 2012 އަދި 2014 ވަނަ އަހަރުގެ ފައިނަލުގައި ޖޮކޮވިޗް ބަލިކޮށްފައެވެ.
2018 ވަނަ އަހަރު ފެޑެރާ ވަނީ ގްރޭންޑް ސްލޭމް 20 ތަށި ކާމިޔާބުކޮށް، އެންމެ ގިނައިން ގްރޭންޑް ސްލޭމް މުބާރާތް ކާމިޔާބުކުރި ކުޅުންތެރިޔާގެ ރިކޯޑު ހަދާފައެވެ. އެ ރިކޯޑާ ފްރެންޗް އޯޕަނުގެ އެންމެ ކާމިޔާބު ކުޅުންތެރިޔާ ނަޑާލް އެއްވަރުކުރީ އާދީއްތަ ދުވަހުގެރޭ ކުޅުނު ފައިނަލް މެޗުގައި ދުނިޔޭގެ ރޭންކިން އެއްވަނައިގައި އޮތް ނޮވަކް ޖޮކޮވިޗް ބަލިކުރުމަށްފަހުއެވެ.
މިހާރު އުމުރުން 34 އަހަރުގެ ނަޑާލްވެސް ވަނީ ގްރޭންޑް ސްލޭމް 20 ތަށި މިހާތަނަށް ކާމިޔާބުކޮށްފައެވެ
