ދުނިޔޭގެ ރޭންކިންގެ އެއްވަނައިގަ އޮތް ބެލްޖިއަމް ބަލިކޮށް ނޭޝަންސް ލީގުގައި ގުރޫޕުގެ އެއްވަނައަށް އިންގްލޭންޑް ޖެހިލައިފިއެވެ.
ވެމްބްލީގައި ކުޅުނު މި މެޗް އިންގްލޭންޑުން ކާމިޔާބުކުރީ 2-1 އިންނެވެ.
މެޗުގައި ފުރަތަމަ ލަނޑުޖަހާ ލީޑު ނެގީ ބެލްޖިއަމުންނެވެ. ފުރަތަމަ ހާފުގެ 18 ވަނަ މިނެޓުގައި ލިބުނު ޕެނަލްޓީއަކުން މި ލަނޑު އެޓީމަށް ކާމިޔާބުކޮށްދިނީ ރޮމެލޫ ލުކާކު އެވެ.
އިންގްލޭންޑުން ނަތީޖާ ހަމަހަމަކުރީ މެޗުގެ 39 ވަނަ މިނެޓުގައި ލިބުނު ޕެނަލްޓީއަކުންނެވެ. މި ލަނޑު ޖެހީ ފޯވަޑް މާކަސް ރަޝްފޯޑެވެ. މެޗުން އިންގްލޭންޑް މޮޅުކޮށްދިން ލަނޑު 65 ވަނަ މިނެޓުގައި ކާމިޔާބުކުރީ މޭސަން މައުންޓެވެ.
މި މޮޅާއެކު އިންގްލޭންޑް ވަނީ ކުޅުނު ތިން މެޗުން ހަތް ޕޮއިންޓް ހަމަކޮށް ގްރޫޕުގެ އެއްވަނައަށް ޖެހިލާފައެވެ. ތިން މެޗުން ހަ ޕޮއިންޓް ހޯދައިގެން ދެވަނައިގައި އޮތީ ބެލްޖިއަމެވެ. ދެ މެޗުން ހޯދި އެއް ޕޮއިންޓާއެކު ތިންވަނައިގައި ޑެންމާކް އޮތްއިރު ފުލުގައި އޮތް އައިސްލޭންޑަށް އަދި ޕޮއިންޓެއް ނުލިބެއެވެ.
