ޓީވީގައި ކާމިޔާބީތަކެއް ހޯދުމަށްފަހު، އެކްޓުރެސް ސަންޖީދާ ޝެއިހް ފިލްމް އިންޑަސްޓުރީއާއި ގުޅިއްޖެއެއެވެ. ޓީވީ ޑުރާމާތަކުން ފެނުނު ސަންޖީދާ މިހާރު ފެނިގެންދަނީ ފިލަމުތަކުންނާއި ވެބް ސީރީސް ތަކުންނެވެ.
ނަމަވެސް އޭނާގެ މަސައްކަތައް ވުރެ ބޮޑަށް އޭނާގެ އަމިއްލަ ދިރިއުޅުން ފޭނުންގެ ތެރޭގައި މާ މަޝްހޫރެވެ. ހާއްސަކޮށް އޭނާ މަންމަ އަކަށް ވުމުންނާއި ފިރިމީހާ އާމިރް އަލީ އާއި ވަރިވުމުން ފޭނުންނަށް ލިބިފައިވަނީ ބޮޑު ޝޮކެކެވެ.
ޕިންކް ވިލާއަށް ދިން އިންޓަވިއުއެއްގައި ސަންޖީދާ ވަނީ ލޮކްޑައުން އޭނާއަށް އުފާވެރިކަން ގެނެސްދިނީ ކީއްވެކަން ކިޔައިދީފައެވެ. ސަންޖީދާ ބުނެފައިވަނީ އެ ދުވަސްތަކަކީ ތަފާތު ތަޖުރިބާއެއް ކަމަށާއި މުޅި ލޮކްޑައުން ހޭދަކުރީ މަންމައާއެކު ކަމަށެވެ. މަންމައާއެކު އުޅޭއިރު އަބަދުވެސް، މަންމަ އޭނާ ތަރުބިއްޔަތު ކުރި ގޮތަށް އޭނާގެ ދަރިފުޅު ތަރުބިއްޔަތުކުރެވޭތޯ މަސައްކަތްކުރާ ކަމަށްވެސް ސަންޖީދާ ބުންޏެވެ. އަދި މަންމަ އަކީ ރައްޓެއްސެއް ވެސް މެ ކަމަށާއި އަދި ދިރިއުޅުމުގެ އެއް ހިއްސާ ކަމަށްވެސް ސަންޖީދާ ވަނީ ބުނެފައެވެ. އެހެންކަމުން ކަރަންޓީނުގެ ދުވަސްތައް މަންމައާއެކު ހޭދަކުރަން ލިބުމަކީ ލިބުނު ވަރަށްބޮޑު އުފަލެއް ކަމަށް އޭނާ ބުންޏެވެ.
View this post on Instagram
މިދިޔަ އަހަރު އޮންލައިން 2 ޕްލެޓްފޯމެއްގައި ސަންޖީދާގެ 2 ފިލްމެއް ގެނެސްދީފައި ވުމާއެކު މިފަދަ އޮންލައިން ޕްލެޓްފޯމްތަކާ ބެހޭގޮތުން ސުވާލުކުރުމުން ބުނެފައިވަނީ އޭނާގެ ފިލްމު " ތައިޝް" އޮންލައިންކޮށް ރިލީޒްކުރީތީ އުފާކުރާ ކަމަށެވެ. އަދި އިންޑަސްޓްރީގައި ގިނައަހަރު ހޭދަކުރި ވަރަކަށް އޭނާގެ އެކްޓިން އެންމެންނަށް ދައްކާލަން ބޭނުންވާކަމަށާއި އޭނާގެ ހުނަރާގުޅޭގޮތުން މީހުން ވާހަކަދެއްކުމަށް ބޭނުންވާކަމަށްވެސް ސަންޖީދާ ވަނީ ބުނެފައެވެ. އެހެންކަމުން އަލަށް މުނިފޫހިފިލުވުމުގެ ދާއިރާއަށް ވަންނަ ކުދިންނަށްވެސް އޯޓީޓީ އަކީ ރަނގަޅު ޕްލެޓްފޯމެއް ކަމަށްވެސް ސަންޖީދާ ބުންޏެވެ.
ސަންޖީދާ އެންމެ ފަހުން ފެނިގެން ގޮސްފައިވަނީ ވީޑިއޯ ލަވަ "ތޯ އާގައޭ ހަމް" އިން ލަވަކިޔުންތެރިޔާ ޖުބިން ނައުޓިޔަލް އާ އެކުގައެވެ. މި ލަވައަށް ވަނީ ގިނަ ބެލުންތެރިންގެ ތަރުހީބު ލިބިފައެވެ.
