ހޫތީންގެ ހަމަލާތަކާއި އެކަމަށް އެމެރިކާގެ ރައީސް ޑޮނަލްޑް ޓްރަމްޕް ދެއްވި ހަރުކަށި އިންޒާރާއެކު، ދުނިޔޭގެ ބާޒާރުގައި ސާފުނުކުރާ ތެޔޮ ފީފާއެއްގެ އަގު 100 ޑޮލަރު ފަހަނައަޅައި ގޮސްފިއެވެ.
ބައިނަލްއަގުވާމީ ބެންޗްމާކް ކަމަށްވާ ބްރެންޓް ނޯތު ސީ ކްރޫޑްގެ އަގު 6 އިންސައްތައަށްވުރެ މައްޗަށް އުފުލި، ފީފާއެއްގެ އަގު ވަނީ 100 ޑޮލަރުގެ ރޮނގު ފަހަނައަޅާފައެވެ. ހަމަ އެ ދަނޑިވަޅުގައި ވެސްޓް ޓެކްސަސް އިންޓާމީޑިއޭޓް (ޑަބްލިއުޓީއައި) ގެ އަގު ވެސް 6.3 އިންސައްތަ އުފުލި، ފީފާއެއްގެ އަގު 92.31 ޑޮލަރަށް އަރައިފައިވެއެވެ.
އިރާނުގެ މަދަދާއެކު ހަރަކާތްތެރިވާ ހޫތީން ރަތްކަނޑުގައި ދެމުންދާ ހަމަލާތައް ހުއްޓުވުމަށް، "އަސްކަރީ ބޮޑު އަދަބެއް" ދޭނެ ކަމުގެ އިންޒާރު ޓްރަމްޕް ދެއްވި ނަމަވެސް، އިރާނުން ބުނަނީ އެ ގައުމަށް އެމެރިކާގެ ހަމަލާތައް އަމާޒުވާ ހާ ހިނދަކު ގަލްފު ސަރަހައްދުގައި ދެމުންދާ ހަމަލާތައް ހުއްޓުމެއް ނެތި ކުރިއަށްދާނެ ކަމަށެވެ.
މި ނުތަނަވަސްކަން ބާޒާރަށް ބޮޑަށް އިހުސާސްވަނީ، ސައޫދީ އަރަބިއްޔާއިން އާންމުކޮށް ހޮރްމޫޒް ކަނޑުއޮޅި މެދުވެރިކޮށް އެކްސްޕޯޓްކުރާ އެތައް މިލިއަން ފީފާ ތެޔޮ، ފަހަކަށް އައިސް ރަތްކަނޑުގެ މަގު ބޭނުންކުރަން ފެށުމުންނެވެ. އެ ދެ މަގުވެސް ނުރައްކަލުގެ ތެރޭގައި އޮތުމަކީ، ދުނިޔޭގެ ބާޒާރަށް ނުކުންނަ ތެލުގެ ސަޕްލައި އިތުރަށް ދަށްވާނެ ކަމެއް ކަމަށް ބެލެވެއެވެ.
"ވެލްތު ކްލަބް"ގެ ޗީފް އިންވެސްޓްމަންޓް ސްޓްރެޓެޖިސްޓް ސުޒާނާ ސްޓްރީޓާ ވިދާޅުވީ، ހަކަތައިގެ ކްރައިސިސްއެއް އުފެދިދާނެ ކަމުގެ ބިރު އިންވެސްޓަރުންގެ މެދުގައި ބޮޑުވެފައިވާ ކަމަށާއި، ހަކަތަ ފޯރުކޮށްދޭ މުހިންމު ދެ މަގު ބަންދުވުމުގެ ފުރުސަތު އޮތުމުން، ތެލުގެ އަގު ދިގު މުއްދަތަކަށް މަތީގައި ހިފެހެއްޓިފައި ހުރެދާނެ ކަމަށް ބާޒާރުތަކުން މިހާރު ތައްޔާރުވެފައިވާ ކަމަށެވެ.
އިގްތިސާދީ ތަޖުރިބާކާރުން ފާހަގަކުރާ ގޮތުގައި، ތެލުގެ އަގު މައްޗަށް ދިއުމުގެ ސީދާ އަސަރު އިންފްލޭޝަނަށް ކުރާނެ ކަމަށާއި، އެއާއެކު އިންޓްރެސްޓް ރޭޓްތައް ވެސް ބޮޑުކުރަން މަޖުބޫރުވެދާނެ ކަމަށެވެ. މީގެ އިތުރުން، ސަރުކާރުތަކުގެ ބޮންޑް ޔީލްޑްސް މައްޗަށް ދިއުމުގެ ސަބަބުން، ދުނިޔޭގެ އެކި ގައުމުތަކުގެ ބަޖެޓަށާއި ހަރަދުތަކަށް ބޮޑެތި ލޮޅުންތަކެއް އަރާނެ ކަމަށް ބެލެވެއެވެ.
ކޮމެންޓު ފޮނުވާ