ސައުދީ އަރަބިއްޔާއިން ޔަމަނުގެ އާންމުން ހިސާރުކުރާ ކަމަށް ބުނެ ހޫތީ ޖަމާއަތުން ކުރަމުންދާ ތުހުމަތުތައް ދިވެހި ސަރުކާރުން ހަރުކަށި އިބާރާތުން ކުށްވެރިކޮށްފިއެވެ.
މިއަދު ފޮރިން މިނިސްޓްރީން ނެރުނު ބަޔާނެއްގައި ބުނެފައިވަނީ، ހޫތީންގެ ފަރާތުން ސައުދީ އަރަބިއްޔާއަށް އަމާޒުކޮށް ކުރަމުންދާ ތުހުމަތުތަކާ ގުޅިގެން ސައުދީ ސަރުކާރުން ނެރުނު ރައްދު ބަޔާނަށް ދިވެހި ސަރުކާރުން ފުރިހަމައަށް ތާއީދުކުރާ ކަމަށެވެ. އަދި މި ދަނޑިވަޅުގައި ސައުދީ ސަރުކާރާއެކު ރާއްޖެ ސާބިތުކަމާއެކު އޮތްކަމުގެ ޔަގީންކަން ދިވެހި ސަރުކާރުން ވަނީ ދީފައެވެ.
ބޭރު ދުނިޔޭގެ މީޑިއާތަކުން ރިޕޯޓުކުރި ގޮތުގައި ހޫތީންގެ އަސްކަރީ ތަރުޖަމާނު ޔަހްޔާ ސަރީއު ވަނީ، ވޭތުވެދިޔަ 12 އަހަރު ދުވަހުގެ ތެރޭގައި ސައުދީން ޔަމަނުގެ އެއްގަމާއި ކަނޑާއި ވައިގެ މަގުތައް ބަންދުކޮށް، އެ ގައުމުގެ އާންމުންގެ މައްޗަށް "އަނިޔާވެރި ހިސާރެއް" ހިންގަމުންދާ ކަމަށް ތުހުމަތުކޮށްފައެވެ. މީގެ އިތުރުން ސައުދީގެ ބަނދަރުތަކަށް ހަމަލާދީ، ތެޔޮ އެކްސްޕޯޓު ކުރާ ކަނޑުމަގުތައް ބަންދުކުރާނެ ކަމުގެ އިންޒާރުވެސް ހޫތީން ވަނީ ދީފައެވެ.
ނަމަވެސް، ދިވެހި ސަރުކާރުން ދެކޭ ގޮތުގައި ސައުދީ އަރަބިއްޔާއަކީ ޔަމަނުގެ ރައްޔިތުންނަށް އިންސާނީ އެހީތެރިކަން ފޯރުކޮށްދިނުމުގައާއި، އެ ގައުމުގެ ތަރައްގީގެ މަޝްރޫއުތައް ކުރިއެރުވުމުގައި އެންމެ އިސް ދައުރެއް އަދާކުރާ އެއް ގައުމެވެ. ޔަމަނުގެ ގާނޫނީ ސަރުކާރާއި އދ.އާ ގުޅިގެން، އެ ގައުމުގައި ދާއިމީ ސުލްހަ ގާއިމުކުރުމަށް ސައުދީން ކުރަމުންދާ އިޚްލާޞްތެރި މަސައްކަތްތައް ރާއްޖެއިން ބަލައިގަންނަ ކަމަށްވެސް އެ ބަޔާނުގައި ފާހަގަކޮށްފައިވެއެވެ.
ހޫތީންގެ ތުހުމަތުތަކާ ގުޅިގެން ސައުދީ ސަރުކާރުން ވެސް ވަނީ އެއީ އެއްވެސް އަސާސެއް ނެތް ދޮގު ވާހަކަތަކެއް ކަމަށް ބުނެ ދޮގުކޮށްފައެވެ. އަދި ކަނޑުގެ ސަރަހައްދުގެ ސަލާމަތާއި އަމަންއަމާންކަން ބެލެހެއްޓުމަށްޓަކައި އަޅަންޖެހޭ ކޮންމެ ފިޔަވަޅެއް، ފަސްޖެހުމެއް ނެތި އަޅާނެ ކަމުގެ ޔަގީންކަން ސައުދީން ވަނީ ދީފައެވެ.
ފޮރިން މިނިސްޓްރީގެ ބަޔާން ނިންމާލަމުން ދިވެހި ސަރުކާރުން ވަނީ، ޔަމަނުގެ ސުލްހަޔާއި ސަލާމަތާއި ހަމަޖެހުމަށްޓަކައި ކުރެވޭ އެންމެހާ މަސައްކަތްތަކުގައި ރާއްޖޭގެ ފުރިހަމަ އެއްބާރުލުން ދެމުންދާނެ ކަމަށާއި، ސައުދީ އަރަބިއްޔާއާ އެކު އޮތް އަޚުވަންތަ ގުޅުން ކުރިއަށް އޮތްތަނުގައިވެސް ދެމިއޮންނާނެ ކަމުގެ ޔަގީންކަން ދީފައެވެ.
ކޮމެންޓު ފޮނުވާ