ރާއްޖޭގެ ކޯޓުތަކުގެ އިސް ފަނޑިޔާރުން މަގާމުން ދުރުކުރުމުގެ ބާރު ޖުޑީޝަލް ސަރވިސް ކޮމިޝަން (ޖޭއެސްސީ) އަށް ލިބިދޭ ޤަވާއިދެއް، އެ ކޮމިޝަނުން މިއަދު އާންމުކޮށްފިއެވެ.
"ކޯޓުތަކަށް އިސް ފަނޑިޔާރުން އައްޔަން ކުރުމާއި ދުރުކުރުމުގައި އަމަލުކުރާނެ ގޮތުގެ ޤަވާއިދު"ގެ ނަމުގައި އެކުލަވާލި މި ޤަވާއިދުގައިވާ ގޮތުން، ކޯޓެއްގެ ހިންގުން ހަރުދަނާކުރުމަށްޓަކައި އެ ކޯޓެއްގެ އިސް ފަނޑިޔާރު މަގާމުން ދުރުކުރަން ޖެހޭ ކަމަށް ޖޭއެސްސީއަށް ފެނިއްޖެ ހާލަތެއްގައި، އެ ފިޔަވަޅު އެޅުމުގެ ބާރު ކޮމިޝަނަށް ލިބިގެންވެއެވެ.
ޤަވާއިދުގައި ބުނެފައިވަނީ، އިސް ފަނޑިޔާރުކަމުގެ މަގާމަށް މީހަކު އައްޔަން ކުރެވޭނީ އެ ފަރާތެއްގެ ތައުލީމާއި ތަޖުރިބާ، އަޚްލާޤާއި ޤާބިލުކަން، އަދި އެ މަސްއޫލިއްޔަތު އަދާކުރުމުގެ އެންމެ އެކަށޭނަ ފަރާތެއްތޯ ވަޒަންކުރުމަށްފަހު، ޖޭއެސްސީގެ މެންބަރުންގެ އަޣްލަބިއްޔަތުން ކަމަށެވެ. މީގެ އިތުރުން، މަޤާމަށް ހުޅުވާލުމުގެ އިޖުރާއަތުތަކާއި، ކުރިމަތިލާ ފަރާތްތަކުގެ އިންޓަވިއު މަރުޙަލާގައި ކޮމިޝަނުގެ މެންބަރުން އަމަލުކުރައްވަންޖެހޭ ގޮތުގެ ތަފްޞީލުތައްވެސް ޤަވާއިދުގައި ބަޔާންކޮށްފައިވެއެވެ.
މި ޤަވާއިދުގެ ދަށުން އިސް ފަނޑިޔާރުންގެ ގޮތުގައި ބެލެވެނީ ހައި ކޯޓަށް އައްޔަން ކުރެވޭ އިސް ފަނޑިޔާރުންނާއި، ސުޕީރިއާ ކޯޓުތަކުގެ އިސް ޤާޟީންނާއި، ޖުޑީޝަލް ދާއިރާތަކުގެ އިސް މެޖިސްޓްރޭޓުންނެވެ.
ޖޭއެސްސީއަކީ ރާއްޖޭގެ ފަނޑިޔާރުންގެ ޤާބިލުކަމާއި މަސައްކަތުގެ ފެންވަރު ވަޒަންކޮށް، ފަނޑިޔާރުންނާ ގުޅޭ ޝަކުވާތައް ބަލައި، އެ ފަރާތްތަކާ މެދު އަޅަންޖެހޭ ފިޔަވަޅުތައް އެޅުމުގެ ޒިންމާ ޤާނޫނު އަސާސީން ހަވާލުކޮށްފައިވާ ކޮމިޝަނެވެ. މިހާތަނަށްވެސް ބައެއް ފަނޑިޔާރުންގެ ސުލޫކީ މައްސަލަތަކާ ގުޅިގެން ކޮމިޝަނުން ވަނީ އެކިއެކި ފިޔަވަޅުތައް އަޅައިފައެވެ.
ކޮމެންޓު ފޮނުވާ