ރާއްޖޭގައި ހިމަބިހި ޖެހުނު މީހުންގެ އަދަދު 144 އަށް އަރައިފި އެވެ.
ހެލްތު ޕްރޮޓެކްޝަން އެޖެންސީ (އެޗްޕީއޭ) އިން މިއަދު އާންމުކުރި ތަފާސްހިސާބުތައް ދައްކާ ގޮތުން، ފާއިތުވި ހަފުތާގެ ތެރޭގައި އެކަނިވެސް ހިމަބިހީގެ 23 އާ ކޭސް ވަނީ ފެނިފަ އެވެ. މީގެ އިތުރުން، ހިމަބިހި ޖެހިގެން ފަރުވާ ދެމުން ދިޔަ ޒުވާނަކު އިއްޔެ ވަނީ މަރުވެފަ އެވެ. ބަލި އެންމެ ގިނައިން ޖެހިފައި ވަނީ 15 އަހަރާއި 35 އަހަރާ ދެމެދުގެ އުމުރުފުރާގެ މީހުންނަށް ކަމަށް އެ އެޖެންސީން ބުނެ އެވެ.
މި ބަލިން ރައްކާތެރިވުމަށް އެޗްޕީއޭ އިން ފެށި ހާއްސަ ވެކްސިން ޕްރޮގްރާމުގެ ދަށުން މިހާތަނަށް 7،100 މީހަކަށް ވެކްސިން ޖަހައިދީފައިވާ ކަމަށާއި، ފުރަތަމަ އިސްކަން ދިނީ ސިއްހީ ހިދުމަތްތެރިންނަށާއި 18 އަހަރުން ދަށުގެ ކުދިންނަށް ކަމަށް އެ އެޖެންސީން ބުންޏެވެ.
މާލޭ ސަރަހައްދުން ވެކްސިން ދިނުމުގެ ހިދުމަތް، ޔޫޕީއެޗްސީސީ، ހުޅުމާލެ ހޮސްޕިޓަލް، ސެނަހިޔާ ހޮސްޕިޓަލް އަދި ވިލިމާލެ ހޮސްޕިޓަލުން ހަފުތާގެ ދުވަސްތަކުގައި އެކި ގަޑިތަކުގައި ފޯރުކޮށްދެމުން އަންނަ އިރު، އަތޮޅުތެރޭގައި ހުންނަ ސިއްހީ މަރުކަޒުތަކުން ހިދުމަތް ދޭ ގަޑިތައް ވަކިން އިއުލާން ކުރާނެ ކަމަށް އެޗްޕީއޭ އިން ބުންޏެވެ.
ކޮމެންޓު ފޮނުވާ