ޔޫގެންޑާގައި ބޭއްވުނު ރިޔާސީ އިންތިޚާބުގެ ވޯޓު ގުނުން ކުރިޔަށް ދަނިކޮށް، 34 އަހަރު ވަންދެން އެގައުމުގައި ވެރިކަން ކުރަމުން އަންނަ ރައީސް ޔުވޭރީ މުސެވިނީ އާއި ވާދަކުރާ، އިދިކޮޅު ލީޑަރު ބޮބީ ވައިންގެ ގެ އެގައުމުގެ ސިފައިން ހިސޯރު ކޮށްފައިވާ ކަމަށް އޭނާ ވިދާޅު ވެއްޖެއެވެ.
ޔޫގެންޑާގެ ރިޔާސީ އިންތިޚާބުގައި 6 ވަނަ ދައުރަކަށް ވާދަކުރައްވަމުން ގެންދަވާ މުސެވިނީއާ ވާދަކުރައްވާ، އެގައުމުގެ ޒުވާން އިދިކޮޅު ލީޑަރު ވިދާޅުވެފައިވާ ގޮތުގައި، ވޯޓު ގުނުން އަދި ނިމިފައި ނުވާއިރު، ސިފައިންވަނީ އޭނާ ހުންނެވި ގެއަށް ހަމަލާދީ އެގެ މިހާރު ހިސޯރު ކޮށްފައި ކަމަށެވެ.
We are under siege. The military has jumped over the fence and has now taken control of our home
— BOBI WINE (@HEBobiwine) January 15, 2021
"އަހަރެމެން މިވަނީ ހިސޯރު ކުރެވިފައި"، ކުރިން މިއުޒިކީ ފަންނާނެއްގެ ގޮތުގައި ޔޫގެންޑާގައި މަޝްހޫރު ވެގެން ގޮސްފައިވާ، މިހާރުގެ އިދިކޮޅު ލީޑަރު ޓުވީޓު ކުރައްވާފައި ވެއެވެ. އޭނާ އިތުރަށް ވިދާޅުވެފައިވަނީ، ޔޫގެންޑާގެ ސިފައިންވަނީ، އޭނާ ހުންނެވި ގޭގެ ފާރުމަތިން ފުންމައިގެން އަރާ، ގޭތެރެއަށް ވަދެ، އެގެ އެމީހުންގެ ބެލުމުގެ ދަށަށް ގެނެސްފައެވެ.
ފަހުގެ ތާރީޚުގައި، ދުނިޔޭގެ ސަމާލުކަމަށް އެންމެ ބޮޑަށް އައިސްފައިވާ، ޔޫގެންޑާގެ ރިޔާސީ އިންތިޚާބުގެ ވޯޓު ގުނުން ކުރިޔަށް ދާއިރު، އިލެކްޝަންސް ކޮމިޝަނުން މިހާތަނަށް އާންމުކޮށްފައިވާ ނަތީޖާތަކަށް ބަލާއިރު، ކުރި ހޯދަމުން ދަނީ މިހާރުގެވެސް ރައީސް ޔުވޭރީ މުސެވިނީއެވެ. އެހެންނަމަވެސް، އިދިކޮޅު ފަރާތްތަކުން ތުހުމަތު ކުރަމުންދަނީ، ވޯޓުގެ ނަތީޖާ އޮޅުވާލާ، ބޮޑެތި މަކަރުތައް ހަދާފައިވާ ކަމަށެވެ.
ޔޫގެންޑާގެ ރަސްމީ އިދާރާތަކުން ހާމަކޮށްފައިވާ މައުލޫމާތުތަކަށް ބަލާއިރު، މިހާތަނަށް ވޯޓުލީ މީހުންގެ ތިން ބައިކޮށް އެއްބައިގެ ވޯޓު ގުނާ ނިމިފައި ވާއިރު، މިހާރުގެ ރައީސް ޔުވޭރީ މުސެވިނީ ވަނީ ވޯޓުގެ ޖުމްލަ %65 ކާމިޔާބު ކޮށްފައެވެ. އަދި ހުރިހާ ސަރަހައްދެއްގައި ކަހަލަ ގޮތަކަށް، ޔުވޭރީ މުސެވިނީ އުޅެނީ ބޮބީ ވައިންއަށްވުރެ ކުރީގައެވެ.
ރައީސް ޔުވޭރީ މުސެވިނީއާ ވާދަކުރަމުންދާ އިދިކޮޅު 10 ކެޑިޑޭޓުންގެ ތެރޭގައި ހިމެނޭ، އެންމެ ކުރީގައިއުޅޭ ވައިންއަށް މިހާތަނަށް ލިބިފައިވާ ކަމަށް ދައްކަނީ ގުނާ ނިމިފައިވާ ވޯޓުގެ ހަތަރުބައި ކޮށްފަ އެއްބައި ވޯޓުކަމަށް އާންމު ކޮށްފައިވާ ހިސާބުތަކުން ދައްކައެވެ.
ޔޫގެންޑާގައި 34 އަހަރު ދުވަހުގެ ދިގު ވެރިކަމެއް ކުރަމުންދާ ޔުވޭރީ މުސެވިނީއާ ދެކޮޅަށް ބޮބީ ވައިންވަނީ، އެގައުމުގެ އެތަކެއް ޒުވާނުންގެ ބޮޑެތި އެއްވުންތައް ބާއްވާ، ޔުވޭރީ މުސެވިނީއަށް ބޮޑެތި ގޮންޖެހުންތަކެއް ކުރިމަތި ކުރުވާފައެވެ. އަދި ހުކުރުދުވަހު، ވައިން ވަނީ، މިއިންތިޚާބުގެ ނަތީޖާ ގަބޫލު ނުކުރުމަށް ޔޫގެންޑާގެ ރައްޔިތުންނަށް ގޮވާލައްވާފައެވެ.
"އަހަރެންނަށް ފުރިހަމަ ޔަގީންކަން އެބައެއް މި ޑިކްޓޭޓަރު ބަލި ކުރެވިއްޖެ ކަމަށް،" ޒުވާން އިދިކޮޅު ލީޑަރު ވައިން ހުކުރު ދުވަހު ވިދާޅުވެފައި ވެއެވެ. "ޔޫގެންޑާގެ ރައްޔިތުން މިވަނީ، ޚުދުމުޚްތާރު ވެރިކަމަކުން، ޑިމޮކްރަސީއަށް ވާސިލް ވުމަށް ވޯޓު ދީފަ. އެހެންނަމަވެސް ޔުވޭރީ މުސެވިނީ ދަނީ، މިއިންތިޚާބުގައި އޭނާ ކުރީގައި އޮތްކަން ހާމަކުރުމަށް މުޅިން ތަފާތު މަންޒަރެއް ދައްކަމުން."
އިންތިޚާބުގެ ނަތީޖާ ހޮނިހިރު ދުވަހު އިއުލާން ކުރެވިގެންދާނެ ކަމަށް ބެލެވޭއިރު، އިންތިޚާބު ކާމިޔާބު ކުރެވިގެންދާނީ، ޖުމްލަ ވޯޓުގެ %50 އަށްވުރެ މަތިން ވޯޓު ހޯދާ ކެނޑިޑޭޓެކެވެ.
