ވެރިކަންކުރާ ޕީޕަލްސް ނޭޝަނަލް ކޮންގްރެސް (ޕީއެންސީ) އިން ކުރިއަށް އޮތް ހަފްތާބަންދުގައި ބާއްވާ އެތެރޭގެ އިންތިޚާބުގައި އެކި މަގާމުތަކަށް 2،500 އަށްވުރެ ގިނަ ކެންޑިޑޭޓުން އިންތިޚާބުކުރާނެ ކަމަށް އެ ޕާޓީން ބުނެފިއެވެ.
ޕާޓީގެ ކޮންގްރެސްގެ ކުރިން ބާއްވާ މި އިންތިޚާބަށް ކުރިމަތިލުމުގެ ފުރުސަތު ޖޫން 30 ވަނަ ދުވަހު ވަނީ ބަންދުވެފައެވެ. ޕީއެންސީގެ ކޮންގްރެސް ބޭއްވުމަށް ހަމަޖެހިފައިވަނީ އަންނަ ސެޕްޓެމްބަރު މަހުގައެވެ.
މި އެތެރޭގެ އިންތިޚާބު ބޭއްވުމަށް ތާވަލުކޮށްފައިވަނީ ހޮނިހިރު ދުވަހަށެވެ.
ޕީއެންސީގެ އިންތިޚާބީ ކޮމިޓީން ބޭއްވި ނޫސްވެރިންގެ ބައްދަލުވުމެއްގައި ޕާޓީގެ ތަރުޖަމާނު މުޙައްމަދު ފިރުޒުލް އަބްދުލް ޚަލީލް ވިދާޅުވީ އިންތިޚާބު ނިމުމުން މުޅި ރާއްޖޭގެ އެކި ކަންކޮޅުތަކުގައި އެކި މަގާމުތަކުގައި 2،500 އަށްވުރެ ގިނަ މަންދޫބުން ތިބޭނެ ކަމަށެވެ.
ކެންޑިޑޭޓުންގެ ސީދާ އަދަދެއް އޭނާ ހާމަނުކުރެއްވި ނަމަވެސް، 131 އަށްވުރެ ގިނަ ފަރާތުން އިންތިޚާބަށް ކުރިމަތިލާފައިވާކަމަށް ވިދާޅުވިއެވެ. އަދި އެޕްލިކޭޝަންތައް މިހާރު ފައިނަލްކޮށްފައިވާކަމަށް ފިރުޒުލް ވިދާޅުވިއެވެ.
"މުޅި ރާއްޖޭގައި ބާއްވާ އިންތިޚާބު ނިމުމުން، ޕާޓީގެ ހަރަކާތްތައް ހިންގުމަށް އެކި މަގާމުތަކުގައި 2،500 އަށްވުރެ ގިނަ މީހުން ތިބޭނެކަން ވަރަށް އުފަލާއެކު ފާހަގަކުރަން. މި ހުރިހާ ފަރާތްތަކަކީވެސް މަގާމުތަކަށް އިންތިޚާބުވެގެން އަންނާނެ ބައެއް. އެހެންކަމުން އެބޭފުޅުންގެ ރަށްރަށުގައި ޕާޓީއާއި ޕާޓީގެ ސިޔާސަތުތައް ކުރިއެރުވުމުގައި އެންމެ އިސް ދައުރެއް އަދާކުރާނީ އެ ފަރާތްތަކުން،" އޭނާ ވިދާޅުވިއެވެ.
ކޮމެންޓު ފޮނުވާ