2020 ވަނަ އަހަރުގެ ލޮކްޑާއުނަށްފަހު ކުންފުނީގެ މަސައްކަތްތައް ފެށިފަހުންވެސް 420 މިލިއަން ރުފިޔާގެ ލޯނު އެސްޑީއެފްސީން ދޫކޮށްފައިވާކަމަށް އެކުންފުނިން ބުނެފިއެވެ.
ކުދި ވިޔަފާރި އާއި މެދުފަންތީގެ ވިޔަފާރި ކުރިއެރުވުމަށް ސަރުކާރުން ރޯރުކޮށްދޭ މާލީއެހީއަށް އަމާޒުކޮށް އުފައްދާފައިވާ ކުންފުނި، އެސްޑީއެފްސީން ގެންދަނި ކޯވިޑް 19ގެ ސަބަބުން އެފަދަ ވިޔަފާރިތަކަށް ލިބޭމާލީ ގެއްލުމުން އަރައިގަތުމަށް އެހީތެރިވަމުންނެވެ. އެގޮތުން ލޮކްޑާއުނަށްފަހުވެސް 305 ފަރާތަކަށް 420 މިލިއަން ރުފިޔާގެ ލޯނު ދޫކޮށްފައި ވާކަމަށް އެކުންފުނިން ބުނެއެވެ.
އެގޮތުން އެންމެ ގިނަ ލޯނު ދޫކޮށްފައިވަނީ ފަތުރުވެރިކަމުގެ ދާއިރާ އާއި ގުޅުންހުރި ވިޔަފާރިތަކަށާއި ކޮމާޝަލް ވިޔަފާރިތަކަށް ކަމަށް އެސްޑީއެފްސީން ބުނެއެވެ. އަދި ސަރުކާރުން އެކުލަވާލާފައިވާ ސްޓްރެޓެޖިކް އެކްޝަން ޕްލޭންގައި ވާގޮތަށް އެސްޑީއެފްސީން މިހާތަނަށް ދޫކޮށްފައިވާ ލޯނުތަކުގެ 33 އިންސައްތަ ލޯނަކީ އަންހެނުންނާއި ޒުވާނުންނަށް ދޫކޮށްފައިވާ ލޯނުތައް ކަންވެސް އެ ކުންފުނިން ފާހަގަކުރެއެވެ.
މީގެ އިތުރުން ވެސް ކޯވިޑް-19 ގެ ބަލިމަޑުކަމާއި ގުޅިގެން ދިވެހިރާއްޖޭގެ ކުދި ވިޔަފާރި އާއި މެދުފަންތީގެ ވިޔަފާރިތަކަށް ކުރިމަތިވަމުންދާ ގޮންޖެހުންތަކަށް ލުޔެއް ހޯދައިދިނުމުގެގޮތުން 2020 ވަނަ އަހަރު ސަރުކާރުން ތާރަފްކުރި އިޤްތިސާދީ ރިކަވަރީ ޕެކޭޖްގެ ދަށުން "ކޯވިޑް-19 ވިޔަފާރި އެހީ" ގެ ނަމުގައި ފިނޭންސް މިނިސްޓްރީ އާއި އެސްޑީއެފްސީ ގުޅިގެން ފޯރުކޮށްދިން މާލީ އެހީވެސް 2205 ފަރާތަކަށް މިހާތަނަށް ދޫކޮށްފައި ވާކަމަށްވެސް އެކުންފުނިން ބުނެއެވެ. އެއީ ޖުމްލަ 381 މިލިއަން ރުފިޔާގެ ލޯނު އެހީއެވެ.
މިއަދާއި ހަމައަށް މުޅިރާއްޖޭގެ ހުރިހާ އަތޮޅެއް ހިމެނޭގޮތަށް 144 ރަށެއްގައި ވިޔަފާރި ހިންގާ ކުރިއެރުވުމަށް އެސްޑީއެފްސީން ލޯނު ދޫކޮށްފައި ވާކަމަށްވެސް އެކުންފުނިން ބުނެއެވެ.
