90ގެ އަހަރުތަކުގައި ބޮލީވުޑްގައި ރަނިކަންކުރި އެއް ތަރިއަކީ އައެޝާ ޖުލްކާ އެވެ. އެޒަމާނުގައި އެންމެބޮޑު ފޭން ބޭސްއެއް ވެސް އޮންނައެއް ތަރިއަކީ އައެޝާ އެވެ. އޭނާ ވަނީ ބޮލީވުޑްގެ ބޮޑެތި ފިލްމުތައް ކަމުގައިވާ "ޖޯ ޖީތާ ވޮހީ ސިކަންދަރް"، "ހިންމަތުވާލާ"، "ކިލާޑީ"، "ޗާޗީ 420″، "ވަޤްތު ހަމާރާހޭ" ފަދަ ފިލްމުތަކުން ފެނިގެންގޮސްފަ އެވެ.
ފަހަކަށް އައިސް އައެޝާގެ ފިލްމުތަކުގެ ދޭތެރެ ދުރުވި ނަމަވެސް މުޅިން އެއްކޮށް ފިލްމީދާއިރާއާ ދުރަށް އޭނާ ޖެހިފައެއް ނުވެއެވެ. އެގޮތުން އެންމެ ފަހުން 2018 ގައި ފިލްމު "ޖީނިއަސް" އިންވެސް އައެޝާ ވަނީ ފެނިގެންގޮސްފަ އެވެ.
ޓައިމްސް އޮފް އިންޑިއާއިން އައެޝާ އާ ކުރި އިންޓަވިއުއެއްގައި އޭނާވަނީ ފިލްމީ ދާއިރާގެ މަސައްކަތާއި ބޭހޭގޮތުން ވާހަކަ ދައްކާފައެވެ. އަދި ފިލްމަކަށް ނޫނެކޭބުނެ އެކަމާ ފަހުން ދެރަވިތޯ ސުވާލުކުރުމުން ފުރަތަމަ ވެސް އައެޝާގެ ދުލަށް އައި ނަމަކީ މަނި ރަތުނަމްގެ "ރޯޖާ" އެވެ. އެ ފިލްމު އޭނާއަށް ދޫކޮށްލަން ޖެހުނީ ވަގުތު ނުދެވިގެންނެވެ. އަދި ބިކިނީއެއް ލާން ޖެހޭތީ "ޕްރޭމް ގައިދީ" ވެސް ދޫކޮށްލަންޖެހުނު ކަމަށް އައެޝާ ބުންޏެވެ.
އައެޝާ ޖުލްކާގެ ކާމިޔާބު ފިލްމު "ޖޯ ޖީތާ ވޮހީ ސިކަންދަރް" އާއި ބެހޭގޮތުން އެހުމުން ބުނެފައިވަނީ އެ ފިލްމަށް އެހާބޮޑު ތަރުހީބެއް ލިބޭނެކަމަށް ހީ ނުކުރާކަމަށާއި ނަމަވެސް އެ ފިލްމުގެ "އަންޖަލީ" ރޯލަކީ ގިނަ ބަޔަކަށް އޭނާ އެނގިގެންދިޔަ ރޯލު ކަމަށެވެ. އަދި މިހާރުވެސް އެކި ތަންތަނަށް ދަތުރުކުރާއިރު އޭނާއާ ބައެއް މީހުން އަންޖަލީގެ ނަމުން މުހާތަބުކުރާ ކަމަށްވެސް އައެޝާ ބުންޏެވެ. އެއާއެކު އެ ފިލްމުގެ ޝޫޓިންގައި އައިޝާގެ ނިތްކުރިއަށް މޮހޮރެއް ހެރުމުންވެސް ޝޫޓިން ކުރިއަށް ގެންދަންޖެހުނު ވާހަކަވެސް ވަނީ ކިޔައިދީފަ އެވެ.
