އެމެރިކާއާ ހަނގުރާމަ ފެށުމުގެ ފުރުސަތު ކުޑަކަމަށް އީރާނުން ބުނުމާއެކު ތެލުގެ އަގު ދަށަށް

އެމެރިކާއާ އެކު އަލުން ހަނގުރާމައަކަށް ދިއުމުގެ ފުރުސަތު ކުޑަކަމަށާއި، ނަމަވެސް ކުރިމަތިވެދާނެ ކޮންމެ ހަމަލާއަކަށް ފުރިހަމައަށް ރައްދުދޭން ތައްޔާރަށް އޮތްކަމަށް އީރާނުގެ ރިވޮލިއުޝަނަރީ ގާޑްސް (އައިއާރްޖީސީ) އިން ބުނެފިއެވެ.

އީރާނުން މިފަދައިން ބުނެފައިވަނީ، އެޕްރީލް މަހު ވެފައިވާ ހަމަލާބަދަލުކުރުން މެދުކަނޑާލުމުގެ އެއްބަސްވުމާ އެމެރިކާއިން ހިލާފުވެފައިވާ ކަމަށް ތުހުމަތުކޮށްފައެވެ. އީރާނުގެ އިންގިލާބީ ލަޝްކަރުގެ ނޭވީގެ ޑެޕިއުޓީ ޕޮލިޓިކަލް ޗީފް މުހައްމަދު އަކްބަރުޒާދޭ ވިދާޅުވީ ދުޝްމަނުންގެ ބަލިކަށިކަމުން އަލުން ހަނގުރާމައަކަށް އެނބުރި ދިއުމުގެ ފުރުސަތު ކުޑަކަމަށެވެ. ނަމަވެސް އެގައުމުގެ ސަލާމަތީ ބާރުތައް އޮތީ ފުރިހަމަ ތައްޔާރީ ހާލަތުގައެވެ. މިދިޔަ ފެބްރުއަރީ މަހު އެމެރިކާއާއި އިޒްރޭލުން އީރާނަށް ދިން ހަމަލާތަކަކާ ގުޅިގެން ފެށުނު މި ހަނގުރާމައިގެ ސަބަބުން މުޅި ސަރަހައްދު ނާމާންވެ، ދުނިޔޭގެ ހަކަތައިގެ ބާޒާރަށް ވަނީ ބޮޑެތި ލޮޅުންތަކެއް އަރާފައެވެ.

ޕާކިސްތާނު މެދުވެރިއެއްގެ ގޮތުގައި ހަރަކާތްތެރިވެ ސުލްހައިގެ އެއްބަސްވުމަކަށް އައުމަށް ކުރެވޭ މަސައްކަތްތަކުން ލިބުނު އުންމީދާއެކު، ދުނިޔޭގެ ބާޒާރުގައި ތެލުގެ އަގު މިހާރު ވަނީ ފަސް ޕަސެންޓް ދަށަށް ގޮސްފައެވެ. އެގޮތުން ބައިނަލްއަގުވާމީ ބެންޗްމާކް ބްރެންޓް ކްރޫޑް ފީފާއެއްގެ އަގު ވަނީ 94.61 ޑޮލަރަށް ވެއްޓިފައެވެ. އެމެރިކާގެ ސެކްރެޓަރީ އޮފް ސްޓޭޓް މާކޯ ރުބިއޯ ވަނީ ސުލްހަވެރި ހައްލަކަށް އާދެވިދާނެ ކަމަށާއި، ނަމަވެސް އީރާނުން ބަންދުކޮށްފައިވާ ދުނިޔޭގެ ވިޔަފާރީގެ މުހިންމު މަގު ކަމަށްވާ ހޮރްމޫޒް ކަނޑުއޮޅި ކޮންމެ ގޮތެއް ހަދައިގެން ވިޔަސް ހުޅުވާނެ ކަމަށް ވިދާޅުވެފައެވެ. އީރާނުން ބުނަމުންދަނީ އެ ކަނޑުއޮޅިން ދަތުރުކުރެވޭނީ އީރާނުގެ އަމުރަށް ބޯލަނބާ އުޅަނދުތަކަށް އެކަނި ކަމަށެވެ.

މި މައްސަލަތަކުގެ ތެރެއިން އީރާނުގެ އިންޓެލިޖެންސް މިނިސްޓްރީން ތުހުމަތުކުރާ ގޮތުގައި، އެމެރިކާއާއި އިޒްރޭލުން ދަނީ އީރާނުގެ ވެރިކަން ވައްޓާލައި ގައުމު ބައިބައިކުރުމަށް މަސައްކަތްކުރަމުންނެވެ. އަދި މިކަމަށްޓަކައި ސްޓާލިންކް އިންޓަނެޓް ޑިވައިސްތަކާއި ހަތިޔާރު ވަގަށް އެތެރެކުރަން އުޅޭކަމުގެ ހެކި ލިބިފައިވާކަމަށްވެސް އެ މިނިސްޓްރީން ބުނެފައިވެއެވެ.

އީރާނުގެ އިސް ލީޑަރު އަޔާތުالله މުޖްތަބާ ޚާމަނައީ ނެރުއްވި ބަޔާނެއްގައި ވިދާޅުވީ މެދުއިރުމަތީގައި އެމެރިކާގެ ނުފޫޒު ކުޑަވަމުންދާ ކަމަށާއި، ސަރަހައްދުގެ ގައުމުތަކުގައި އެމެރިކާގެ އަސްކަރީ މަރުކަޒުތައް ބެހެއްޓުން ހުއްޓާލުމަށް އިންޒާރު ދެއްވާފައެވެ. މަސްރަހަށް އަންނަމުންދާ ބަދަލުތަކާއެކު، ތިން މަސްދުވަހުގެ މެދުކެނޑުމަކަށްފަހު އީރާނުގެ ކަމާބެހޭ ފަރާތްތަކުން މިހާރު ވަނީ ބައެއް ސަރަހައްދުތަކަށް އަލުން އިންޓަނެޓްގެ ހިދުމަތްވެސް ދޫކޮށްފައެވެ.