އެމެރިކާގެ އަސްކަރިއްޔާއިން ދެކުނު އީރާނަށް އަމާޒުކޮށް އާ ޙަމަލާތަކެއް ދީފިއެވެ. މި ޙަމަލާތައް އަމާޒުކޮށްފައިވަނީ އީރާނުގެ މިސައިލް ސައިޓުތަކަށާއި މައިން ހަރުކުރަން އުޅުނު ބޯޓުތަކަށެވެ.
އެމެރިކާގެ ސެންޓްރަލް ކޮމާންޑުން ނެރުނު ބަޔާނެއްގައި ބުނެފައިވަނީ މި ޙަމަލާތަކަކީ "އަމިއްލަ ދިފާޢުގައި" ދިން ޙަމަލާތަކެއް ކަމަށާއި، މިއީ "އީރާނުގެ ފައުޖުތަކުން ކުރިމަތިވެދާނެ ނުރައްކާތަކުން އެމެރިކާގެ ސިފައިން ރައްކާތެރިކުރުމަށް" ދިން ޙަމަލާތަކެއް ކަމަށެވެ.
ސެންޓްރަލް ކޮމާންޑްގެ ތަރުޖަމާނު ކެޕްޓަން ޓިމް ހޯކިންސް ވިދާޅުވީ، ހިނގަމުންދާ ޙަމަލާބަދަލުކުރުން ހުއްޓާލުމުގެ އެއްބަސްވުމުގެ ތެރޭގައިވެސް، އެމެރިކާގެ އަސްކަރިއްޔާއިން "ކެތްތެރިކަމާއެކު އެމެރިކާގެ ފައުޖުތައް ދިފާޢުކުރަމުން ގެންދާނެ" ކަމަށެވެ.
މި ޙަމަލާތައް ދީފައިމިވަނީ، އެމެރިކާއާއެކު ކުރިއަށްދާ މަޝްވަރާތަކުގައި ކޮންމެވެސް ވަރެއްގެ ކުރިއެރުމެއް ލިބިފައިވާ ކަމަށާއި، ނަމަވެސް ހަނގުރާމަ ނިމުމަކަށް ގެނައުމުގެ އެއްބަސްވުމަކަށް އަދި ނާދެވޭ ކަމަށް އީރާނުގެ ޚާރިޖީ ވުޒާރާގެ ތަރުޖަމާނު އިސްމާޢީލް ބަޤާއީ ވިދާޅުވެފައިވާ ދަނޑިވަޅެއްގައެވެ.
ނިއުޔޯކް ޓައިމްސްއާ ޙަވާލާދީ ކެޕްޓަން ހޯކިންސް ވިދާޅުވީ، މި ޙަމަލާތައް އަމާޒުކޮށްފައިވަނީ ހޯމޫޒް ކަނޑުއޮޅީގައި އޮންނަ އީރާނުގެ ކަނޑުގެ އަސްކަރީ މަރުކަޒެއް ހިމެނޭ ދެކުނުގެ ބަނދަރުމަތީ ރަށެއް ކަމަށްވާ ބަންދަރު އައްބާސް ކައިރީގައިވާ ސަރަޙައްދަކަށެވެ.
އީރާނުގެ ދައުލަތުގެ މީޑިއާއިން މީގެ ކުރިން ރިޕޯޓުކޮށްފައިވާ ގޮތުގައި، ބަންދަރު އައްބާސްގައި ގޮވުންތަކެއްގެ އަޑު އިވުމާ ގުޅިގެން އެ ސަރަޙައްދުގެ އޮފިޝަލުން އަންނަނީ އެކަން ތަޙުޤީޤުކުރަމުންނެވެ.
އެމެރިކާއިން ދިން އެންމެ ފަހުގެ ޙަމަލާތަކަށް އީރާނުން އަދި ރައްދުދީފައެއް ނުވެއެވެ. މިކަމުގެ ސަބަބުން އެމެރިކާއާއި އީރާނާ ދެމެދު ވެވިދާނެ ޞުލްޙައިގެ އެއްބަސްވުމަކަށް ކުރާނެ އަސަރެއް އަދި ސާފެއް ނުވެއެވެ.
މި ޙަމަލާތަކަށްފަހު، އެމެރިކާގެ ސެކްރެޓަރީ އޮފް ސްޓޭޓް މާކޯ ރޫބިއޯ ވިދާޅުވީ އެއްބަސްވުމަކަށް އައުމުގެ ފުރުޞަތު އަދިވެސް އެބައޮތް ކަމަށާއި، އަންގާރަ ދުވަހު އީރާނުގެ އިސް ނެގޯޝިއޭޓަރާއި ޚާރިޖީ ވަޒީރާއި ޤަތަރުގެ ބޮޑުވަޒީރާ ދެމެދު ބޭއްވި މަޝްވަރާތަކަށް އޭނާ ވަނީ އަލިއަޅުވާލައްވާފައެވެ.
ކޮމެންޓު ފޮނުވާ