އިދިކޮޅު އެމްޑީޕީގެ އެތެރޭގައި އެންމެ ބޮޑު ތާއީދެއް އޮތީ ކޮން ފަޅިއަކަށްކަން ސާފުވާނީ ޕާޓީގެ ޗެއާޕާސަން ކަމުގެ އިންތިހާބު ވީހާވެސް އަވަހަކަށް ބާއްވައިގެން ކަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެ އެވެ.
އެމްޑީޕީގެ ޗެއާޕާސަން އިންތިހާބާއި ގައުމީ މަޖިލީހުގެ އިންތިހާބު ފަސްކުރުމަށް ޕާޓީގެ ވަގުތީ ޗެއާޕާސަން އަބްދުލްޣަފޫރު މޫސާ (ގަޕޯ) ރޭ ވަނީ ހުށަހަޅުއްވާފަ އެވެ. އެގޮތަށް ހުށަހެޅުއްވީ އިންތިހާބުތައް ބޭއްވުމަށް ބޭނުންވާ ފައިސާ ނެތުމާއި، މި ދަނޑިވަޅުގައި އިންތިހާބު ބާއްވައިފިނަމަ ޕާޓީގެ އެތެރޭގެ މަސްލަހަތު ގެއްލިދާނެކަމުގެ ބިރު އޮތުމުންނެވެ. ނަމަވެސް، ޗެއާޕާސަން ކަމަށް ވާދަކުރައްވާ މީކާއިލް ނަސީމް ވަނީ އިންތިހާބު ފަސްކުރުމާ ކަނޑައެޅިގެން ދެކޮޅު ހައްދަވާފަ އެވެ.
މި އިންތިހާބުގައި މީކާއިލްއާ ވާދަކުރައްވާ ރައީސް ނަޝީދު މިއަދު ކެމްޕެއިންގެ ތެރެއިން ޕާޓީގެ މެމްބަރުންނާ ބައްދަލުކުރައްވައި ވިދާޅުވީ، ޕާޓީގެ އެތެރޭގެ މަސްރަހު މިހާރު އޮތްގޮތުން އެމަނިކުފާނާއި ކުރީގެ ރައީސް އިބްރާހިމް މުހައްމަދު ސޯލިހާ މެދުވެސް ހިތްހަމަނުޖެހޭ މެމްބަރުން އެބަތިބި ކަމަށެވެ. އެހެންކަމުން، ގިނަ މެމްބަރުންގެ ތާއީދު އޮތީ ކޮންބަޔަކަށްތޯ ބެލުމަށްޓަކައި ރަނގަޅު ވޯޓަކަށް ދިއުން މުހިންމުކަމަށް އެމަނިކުފާނު ފާހަގަކުރެއްވި އެވެ.
މީގެ އިތުރުން، ޕާޓީގެ ތެރޭގައި ތާއީދު ބޮޑު ފަޅިއެއް ވީހާވެސް އަވަހަކަށް ކަށަވަރު ނުކުރެވިއްޖެނަމަ، އެމްޑީޕީގެ އެތެރޭގެ މަސްލަހަތު އަނެއްކާވެސް އިތުރަށް ގޯސްވެގެން ހިނގައިދާނެކަމުގެ އިންޒާރު ރައީސް ނަޝީދު ވަނީ ދެއްވާފަ އެވެ.
ކޮމެންޓު ފޮނުވާ