ލޯކަލް ކައުންސިލް އިންތިހާބުގައި އެމްޑީޕީން ހޯދި ކާމިޔާބީއާއެކު، ޕާޓީގެ ހުންގާނާ އަލުން ހަވާލުވެވަޑައިގަތުމަށް ކުރީގެ ރައީސް މުހައްމަދު ނަޝީދު ފެއްޓެވި މަސައްކަތްޕުޅާއެކު އެމްޑީޕީގެ އެތެރޭގެ ހިޔާލުތަފާތުވުންތައް އަނެއްކާވެސް ބޮޑުވެއްޖެއެވެ.
"ބޮޑު ބަދަލެއް" ގެނައުމުގެ ނަމުގައި ގާނޫނުއަސާސީއާއި ނިޒާމަށް ބަދަލުތަކެއް ގެނައުމަށް ރައީސް ނަޝީދު ހުށަހެޅުއްވުމާއެކު، އެކަމާ މަޝްވަރާކުރަން ރައީސުލްޖުމްހޫރިއްޔާ ޑރ. މުހައްމަދު މުއިއްޒު ވަނީ ދެކޮޅު ހައްދަވާފައެވެ. ރައީސް މުއިއްޒު ވިދާޅުވީ އެމަނިކުފާނު އަމަލުކުރައްވާނީ ރައްޔިތުންނަށް ވެވަޑައިގެންފައިވާ ފަސް އަހަރުގެ މެނިފެސްޓޯއާ އެއްގޮތަށް ކަމަށެވެ. ސަރުކާރުގެ މި ނިންމުމާއެކު، ނަޝީދު ވަނީ މަޝްވަރާގެ މޭޒަށް ސަރުކާރުން ނާންނަހާ ހިނދަކު މުޅި ރާއްޖޭގައި އިހުތިޖާޖުތައް ކުރިއަށް ގެންދަވާނެކަމުގެ އިންޒާރު ދެއްވާފައެވެ.
ނަމަވެސް ނަޝީދުގެ މި ހަރަކާތްތަކަށް ސަރުކާރަށްވުރެ ބޮޑަށް ފާޑުކިޔުމާއި ނުރުހުން އަމާޒުވަމުންދަނީ ސީދާ އެމްޑީޕީގެ އެތެރެއިންނެވެ. އެގޮތުން ކުރީގެ ފަސްޓް ލޭޑީ ފަޒްނާ އަހްމަދު ވަނީ ނަޝީދުގެ ވާހަކަތަކަށް ސޯޝަލް މީޑިއާގައި މަލާމާތް ރައްދުކުރައްވާފައެވެ. ފަޒްނާ ފާހަގަކުރެއްވި ގޮތުގައި ފަހުގެ އިންތިހާބުތަކުން އެމްޑީޕީއަށް ލިބުނު ކާމިޔާބީއަކީ ޕާޓީ ދޫކުރައްވައި ވަޑައިގަތުމަށްފަހު ކުއްލިއަކަށް ވަޑައިގެންނެވި ބޭފުޅެއްގެ ސަބަބުން ލިބުނު ކުރިއެރުމެއް ނޫނެވެ. އެއީ ނާކާމިޔާބީތަކަށްފަހުވެސް މެދުކެނޑުމެއްނެތި އެމްޑީޕީގެ އާންމު މެންބަރުން ސާބިތުކަމާއެކު ކުރި ބުރަ މަސައްކަތުގެ ނަތީޖާއެވެ. މީގެ އިތުރުން، އެމްޑީޕީގެ ޗެއާޕާސަން ކަމަށް ވާދަކުރައްވާ މީކާއިލް އަހުމަދު ނަސީމް ވެސް ވަނީ، ނިޒާމީ ބޮޑު ބަދަލެއްގެ ވާހަކަ ސަރުކާރާއެކު ދެއްކުމުގެ ކުރިން އެކަމާމެދު އެމްޑީޕީގެ ގައުމީ މަޖިލީހުގައި މަޝްވަރާކުރަންޖެހޭނެކަން ފާހަގަކުރައްވާފައެވެ.
އެމްޑީޕީ އުނދަގޫ ހާލަތެއްގައި އޮއްވައި ޕާޓީ ރޫޅާލަން މަސައްކަތްކުރެއްވުމަށްފަހު، އެނބުރި ވަޑައިގެން ޕާޓީގެ ލީޑަޝިޕް ނެންގެވުމަށް ނަޝީދު ކުރައްވާ މަސައްކަތަކީ ސިޔާސީ އުކުޅެއްގެ ގޮތުގައި ގިނަ ބަޔަކު ސިފަކުރެއެވެ. ކުރީގެ ޗެއާޕާސަން ފައްޔާޒް އިސްމާއީލް ވެރިކަމަށް ގެންނަން ތާއީދުކުރައްވާކަމަށް ވިދާޅުވުމާއި، "ބޮޑު ބަދަލު"ގެ ނަމުގައި ކުރީގެ ބަރުލަމާނީ ނިޒާމުގެ ވާހަކަ އަލުން ފެންމަތިކުރުމަކީ ޕާޓީގެ ތެރޭގައި ފެކްޝަނެއް ހައްދަވައި ބާރުވެރިކަން ހޯއްދެވުމަށް ކުރައްވާ ކަމެއް ކަމަށް ބެލެވެއެވެ. ކުރިއަށް އޮތް އެމްޑީޕީގެ އެތެރޭގެ އިންތިހާބުތަކުން، މި ބައިބައިވުންތަކަށް އާންމު މެންބަރުން ޖާގަދޭނެތޯ ނުވަތަ ނޫންތޯ ވަރަށް ސާފުކޮށް ފެނިގެންދާނެއެވެ.
ކޮމެންޓު ފޮނުވާ