ހުޅުމާލޭ "ކްލީން ޕްލޭޓް" ކެފޭގެ ބަދިގޭގައި އަލިފާން ރޯވެއްޖެ

ހުޅުމާލެ ފުރަތަމަ ފިޔަވަހީގައި ހިންގަމުން އަންނަ "ކްލީން ޕްލޭޓް" ކެފޭގެ ބަދިގޭގައި ރޭ ދަންވަރު އަލިފާނުގެ ހާދިސާއެއް ހިނގައިފިއެވެ.

މޯލްޑިވްސް ނޭޝަނަލް ޑިފެންސް ފޯސް (އެމްއެންޑީއެފް) އިން މަޢުލޫމާތު ދެއްވާ ގޮތުގައި، މި ހާދިސާގެ ރިޕޯޓު އެ އިދާރާއަށް ލިބިފައިވަނީ ރޭ މެންދަމު 02:20 ހާއިރުއެވެ. ރިޕޯޓު ލިބުމާއެކު ސިފައިންގެ ފަޔަރ އެންޑް ރެސްކިއު ޓީމުން ވަގުތުން ހަރަކާތްތެރިވެ، ގިނައިރުތަކެއް ނުވެ 02:34 ހާއިރު ވަނީ އަލިފާންގަނޑު ކޮންޓްރޯލްކޮށް އެއްކޮށް ނިއްވާލާފައެވެ.

މަޢުލޫމާތު ލިބިފައިވާ ގޮތުގައި މި ހާދިސާގައި އަލިފާން ރޯވާން މެދުވެރިވީ ބަދިގޭގައި ބޭނުންކުރާ ގޭސްފުޅިއެއްގައި ރޯވުމުގެ ސަބަބުންނެވެ. އަލިފާނުގެ ސަބަބުން ކެފޭގެ ބަދިގޭގެ އެކި ބައިތަކަށް އެކިވަރުގެ ގެއްލުންތަކެއް ލިބިފައިވީ ނަމަވެސް، މި ހާދިސާގައި އެއްވެސް މީހަކަށް އަނިޔާއެއް ލިބިފައި ނުވާކަމަށް ކަމާބެހޭ ފަރާތްތަކުން ކަށަވަރުކޮށްދެއެވެ.