އައްޑޫ ސިޓީގައި އިދިކޮޅު އެމްޑީޕީގެ އިސް މަގާމުތަކެއް ފުރުއްވާފައިވާ ގިނަ ބޭފުޅުންތަކެއް ސަރުކާރު ހިންގާ މައި ޕާޓީ، ޕީއެންސީއަށް މިރޭ ސޮއިކުރައްވައިފިއެވެ.
މި ބޭފުޅުން ޕީއެންސީއާ ގުޅިވަޑައިގަތުމުގެ ފޯމުތައް ހަވާލުކުރެއްވީ އާޓިފިޝަލް ބީޗުގައި މިރޭ ކުރިއަށްދިޔަ "ދަ ގްރޭޓާ އައްޑޫ ވިޝަން" ލޯންޗުކުރުމުގެ ޖަލްސާގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުއާއެވެ.
ވެރިކަންކުރާ ޕާޓީއާ އަލަށް ގުޅިވަޑައިގަތް ބޭފުޅުންގެ ތެރޭގައި އައްޑޫ ސިޓީގެ އެމްޑީޕީގެ ކުރީގެ ރައީސް އަޙްމަދު އަދުހަމާއި، ފޭދޫ ދާއިރާގެ އެމްޑީޕީގެ ކުރީގެ ރައީސް ޢަބްދުﷲ ސަޢީދުގެ އިތުރުން އެ ދާއިރާގެ ކުރީގެ ނައިބު ރައީސް މުޙައްމަދު ސަޢީދު (ދަގޭ) ހިމެނިވަޑައިގަންނަވައެވެ. އަދި ފޭދޫ ދާއިރާގެ ކުރީގެ ކައުންސިލަރު ކަމާއި އެލްޖީއޭގެ މެންބަރުކަން ކުރެއްވި އަޙްމަދު މިރުޒާލް ވެސް ވަނީ ޕީއެންސީއަށް ސޮއިކުރައްވާފައެވެ.
މީގެ އިތުރުން، ސްރީލަންކާގައި އެމްޑީޕީގެ ހަރަކާތްތަކުގައި އިސްކޮށް އުޅުއްވި ފާޠިމަތު ޝިޔާމާއާއި، އައްޑޫ ސިޓީގެ އަންހެނުންގެ ތަރައްޤީއަށް މަސައްކަތްކުރާ ކޮމިޓީގައި ތިންވަނަ ދައުރެއް ފުރިހަމަކުރައްވަމުން ގެންދަވާ ޙައްވާ ޒާހިރާ ވެސް ވަނީ އެ ޕާޓީއާ ގުޅިވަޑައިގެންފައެވެ.
މިރޭގެ ޚާއްޞަ ޖަލްސާގައި، ކުރިއަށް އޮތް ލޯކަލް ކައުންސިލްތަކުގެ އިންތިޚާބާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ އިންތިޚާބުގައި ޕީއެންސީގެ ޓިކެޓުގައި އައްޑޫ ސިޓީއަށް ވާދަކުރައްވާ ކެންޑިޑޭޓުން ވެސް ވަނީ އާންމުންނަށް ތަޢާރަފުކޮށްދީފައެވެ.
ކޮމެންޓު ފޮނުވާ