މާލެ ފިޔަވައި ރާއްޖޭގައި އެންމެ ފުރަތަމަ ސިޓީގެ ދަރަޖަ ލިބުނު އައްޑޫއަށް ވުރެ ފަހުން އެ ދަރަޖަ ލިބުނު ތަންތަން މާ ބޮޑަށް ކުރިއަރައި ގޮސްފައިވާ ކަމަށާއި، އައްޑޫގެ މި ހާލަތު ބަދަލުކުރާނީ ރައީސް ޑރ. މުހައްމަދު މުއިއްޒުގެ ސަރުކާރުން ކަމަށް ފޭދޫ ދެކުނު ދާއިރާގެ މެމްބަރު އިބްރާހިމް ދީދީ ވިދާޅުވެއްޖެއެވެ.
ޕީއެންސީގެ އައްޑޫ ސިޓީ މާލެ އޭރިއާ ޖަގަހަ ހުޅުވުމަށް ބޭއްވި ރަސްމިއްޔާތުގައި ވާހަކަދައްކަވަމުން މެމްބަރު ވިދާޅުވީ، ސިޔާސީ ޕާޓީތަކުން އައްޑޫގައި ހަރަކާތްތެރިވާތާ އެތައް ޒަމާނެއް ވެފައިވީ ނަމަވެސް، ފަހުން ސިޓީއަކަށް ބަދަލުވި ރަށްތަކާ އަޅާބަލާއިރު އައްޑޫ މިއަދު އޮތީ ތަރައްގީގެ ގޮތުން މާ ފަހަތުގައި ކަމަށެވެ. މިކަމުގެ ޒިންމާ މެމްބަރު އެޅުއްވީ އައްޑޫ ސިޓީ ކައުންސިލްގެ ބޮލުގައެވެ. އޭނާ ވިދާޅުވި ގޮތުގައި ކައުންސިލުން ކަންކަން ކުރަމުންދަނީ އެންމެ އެކަށީގެންވާ ގޮތަކަށް ނޫނެވެ.
އިބްރާހީމް ދީދީ ވަނީ އައްޑޫ ސިޓީގެ މޭޔަރު އަލީ ނިޒާރަށް ވަރަށް ބޮޑަށް ފާޑުވިދާޅުވެފައެވެ. ކައުންސިލްގައި ހުންނަވައިގެން މޭޔަރަށް އައްޑޫއަށް ކޮށްދެއްވުނު ފައިދާއެއް ނެތް ކަމަށާއި، އެހެންކަމުން ތަރައްގީގެ ވާހަކަ ދައްކަވަން މޭޔަރު މިއަދު ލަދުގަންނަން ޖެހޭނެ ކަމަށް މެމްބަރު ވިދާޅުވިއެވެ. މީގެ އިތުރުން، ވޭތުވެދިޔަ 15 އަހަރު އެމްޑީޕީގެ މެޖޯރިޓީ އޮވެމެ، އައްޑޫއަށް ގެނެވުނު ތަރައްގީއެއް ފެންނަން ނެތްކަން ފާހަގަކުރައްވައި، މިހާރުގެ ސަރުކާރުން ކަންކަން ކުރަން އުޅުމުން ކައުންސިލުން ސަރުކާރަށް ޖެއްސުންކޮށް، އުނދަގޫ ކުރަމުންދާ ކަމަށް އޭނާ ތުހުމަތުކުރެއްވިއެވެ.
މެމްބަރު ވިދާޅުވީ އައްޑޫގެ ރައްޔިތުން އެދޭ ހަގީގީ ބަދަލު ގެނެސްދެއްވާނީ ރައީސުލްޖުމްހޫރިއްޔާ ޑރ. މުހައްމަދު މުއިއްޒު ކަމަށެވެ. އަދި ރައީސްގެ ކިބައިގައި އެ ގާބިލުކަމާއި ހުނަރު ހުންނާނެ ކަމުގެ ފުރިހަމަ ޔަގީންކަން އެބައޮތް ކަމަށް ވެސް އިބްރާހިމް ދީދީ ވިދާޅުވިއެވެ.
ކޮމެންޓު ފޮނުވާ