ދުނިޔޭގެ މަޝްހޫރު ޑިޖިޓަލް ވޮލެޓްތަކާ ވާދަކުރެވޭ ފެންވަރަށް، 100 ޕަސެންޓް ދިވެހިން ތަރައްގީކޮށްފައިވާ ބޭންކް އޮފް މޯލްޑިވްސް (ބީއެމްއެލް)ގެ އިންޓަނޭޝަނަލް ޑިޖިޓަލް ވޮލެޓް "ސްވައިޕް" ޖަރުމަނުގައި ލޯންޗުކޮށްފިއެވެ.
މި ޚިދުމަތް ރަސްމީކޮށް ތައާރަފްކޮށްދެއްވީ ޖަރުމަނުގައި މިހާރު ކުރިއަށްދާ ބާލިން ފެއާގެ ވިޒިޓް މޯލްޑިވްސް ސްޓޯލްގައި ބޭއްވި ރަސްމިއްޔާތެއްގައި ބީއެމްއެލްގެ ސީއީއޯ މުހައްމަދު ޝަރީފެވެ. މި ވޮލެޓު ތައާރަފްކުރުމަށްފަހު މީޑިއާއަށް މައުލޫމާތު ދެއްވަމުން ޝަރީފް ވިދާޅުވީ، މިއީ އެންމެ ޒަމާނީ ވަސީލަތްތައް ބޭނުންކޮށްގެން ދިވެހިން ފަރުމާކޮށްފައިވާ ދުނިޔޭގެ ފެންވަރުގެ އުފެއްދުމެއް ކަމަށާއި، ބައިނަލްއަގްވާމީ ބޮޑެތި ވޮލެޓްތަކާ އެއްހަމައެއްގައި މި ޕްލެޓްފޯމް ފައިތިލަ ސާބިތުކުރާނެ ކަމަށެވެ.
ސްވައިޕްގެ އެންމެ ބޮޑު ފައިދާއެއް ކުރާނީ ރިސޯޓްތަކާއި ވިޔަފާރިތަކަށްކަން ފާހަގަކުރައްވައި ޝަރީފް ވިދާޅުވީ، މިހާރު ކްރެޑިޓް ކާޑުތަކާއި އެހެނިހެން ކާޑުތަކުން ޕޭމަންޓް ހަދާއިރު ނަގާ 2.5 ޕަސެންޓުގެ ކޮމިޝަނާ ޚިލާފަށް، ސްވައިޕް މެދުވެރިކޮށް ހަދާ ޓްރާންސެކްޝަންތަކުން ބޭންކުން ނަގާނީ އެންމެ ޕަސެންޓެއް ކަމަށެވެ. މީގެއިތުރުން ކާޑު ހޯލްޑަރުންނާއި މާޗެންޓުންގެ އަތުން އެއްވެސް އިތުރު ފީއެއް ނުނަގާނެ ކަމަށާއި، ކަސްޓަމަރު ރާއްޖޭގެ ކޮންމެ ތަނެއްގައި ހުރެ ޕޭމަންޓް ހެދި ނަމަވެސް ވިޔަފާރިވެރިޔާއަށް ވަގުތުން ފައިސާ ލިބޭނެ އިންތިޒާމް މި ވޮލެޓުގެ ތެރެއިން ހަމަޖެހިފައިވާކަމަށް އޭނާ ވިދާޅުވިއެވެ. މިއީ ބޮޑެތި އަދަދުތަކުން މުއާމަލާތްކުރާ ރިސޯޓްތަކަށް ލިބިގެންދާނެ ވަރަށް ބޮޑު މާލީ ލުޔެކެވެ.
ރާއްޖޭގެ ރެގިއުލޭޓަރީ މިންގަނޑުތަކާއި އިންޓަރނޭޝަނަލް ޕޭމަންޓް ސްޓޭންޑާޑްތަކާ އެއްގޮތަށް ފަރުމާކޮށްފައިވާ މި މަލްޓި-ކަރަންސީ ވޮލެޓަކީ ހަމައެކަނި ރާއްޖެއަށް ޚާއްސަ އެއްޗެއް ނޫނެވެ. ބީއެމްއެލްއިން މައުލޫމާތު ދޭ ގޮތުގައި ދުނިޔޭގެ ކޮންމެ ގައުމެއްގައި ހުރެގެންވެސް ކޮންމެ މީހަކަށްވެސް މި ވޮލެޓް ބޭނުންކުރެވޭނެއެވެ. ވޮލެޓް ޓޮޕްއަޕް ކުރުމަށް ބީއެމްއެލް އެކައުންޓްތަކުގެ އިތުރުން ކޮންމެ ކްރެޑިޓް ނުވަތަ ޑެބިޓް ކާޑެއްވެސް ބޭނުންކުރެވޭނެއެވެ. އަދި ރާއްޖެއިން ބޭރުގެ ފަރާތްތަކަށް ފައިސާ ފޮނުވުމާއި، ބޭރުން ރާއްޖެއަށް ފައިސާ ފޮނުވުމުގެ ފުރުސަތުވެސް މިއަދުން ފެށިގެން މި ވޮލެޓް މެދުވެރިކޮށް ލިބިގެންދާނެއެވެ.
ބީއެމްއެލްއިން ދެކޭ ގޮތުގައި ސްވައިޕަކީ ދިވެހި ޒުވާނުންނާއި ވިޔަފާރިތަކަށް ފަސޭހަކަމާއެކު ކްރޮސްބޯޑާ ޓްރާންސެކްޝަންތައް ހިންގުމަށް ލިބޭ މުހިންމު ވަސީލަތެކެވެ. މި ވޮލެޓުގެ ސަބަބުން މުއާމަލާތްތަކުގެ ޚަރަދު ކުޑަވެ، ބޭރު ފައިސާ ރާއްޖެއަށް ގެނައުމަށް އެހީތެރިވެދިނުމުގެ އިތުރުން، ބޭރު ފައިސާ ހޯދުމަށް މިހާރު ދިމާވެފައިވާ ދަތިތަކަށްވެސް ލުޔެއް ލިބިގެންދާނެ ކަމަށް ބޭންކުން ބުނެއެވެ.
ކޮމެންޓު ފޮނުވާ