މަގުބޫލު އުޒުރެއް ނެތި 110 މީހުންގެ އުމްރާ ދަތުރު އެންމެ ފަހު ވަގުތު ކެންސަލްކުރި މައްސަލައިގައި، އަލްއަބްރާރް ގުރޫޕަށް ދީފައިވާ އުމްރާއަށް މީހުން ގެންދިއުމުގެ ހުއްދަ އިސްލާމިކް މިނިސްޓްރީން މިއަދު ވަގުތީ ގޮތުން ހިފަހައްޓައިފިއެވެ.
އިސްލާމިކް މިނިސްޓްރީން ބުނެފައިވަނީ އަބްރާރު ގުރޫޕުން ދަތުރު ކެންސަލްކޮށްފައިވަނީ ރާއްޖެއިން މީހުން އުމްރާއަށް ގެންދިއުމުގެ އުސޫލާ ޚިލާފަށް ކަމަށްވާތީ، އެކަން އެ ކުންފުންޏަށް މިހާރު އަންގާފައިވާ ކަމަށެވެ. އަދި އުސޫލުގެ ތެރެއިން އަޅަންޖެހޭ އިތުރު ފިޔަވަޅުތައްވެސް އެ ކުންފުންޏާ މެދު އަޅާނެކަމުގެ ޔަގީންކަން މިނިސްޓްރީން ވަނީ ދީފައެވެ. މި ދަތުރު ކެންސަލްކުރުމަށް މެދުއިރުމަތީގެ ހަނގުރާމައިގެ ހާލަތު ސަބަބެއްކަމަށް އެ ގުރޫޕުން ބުނި ނަމަވެސް، އުމްރާއަށް ދާން ތިބި މީހުން ތުހުމަތުކުރާ ގޮތުގައި އެ ކުންފުނިން ވިސާ އާއި ހޮޓަލަށް ފައިސާ ދައްކާފައެއް ނުވެއެވެ.
މި މައްސަލަ ދިމާވުމާއެކު، އުމްރާއަށް ނުފުރި ތިބި މީހުންނަށް އެހީތެރިވުމުގެ ގޮތުން ހައްޖު ކޯޕަރޭޝަނުން މިހާރު ވަނީ އޭގެ ތެރެއިން 28 މީހަކަށް ޖާގަ ހަމަޖައްސައިދީފައެވެ. އަދި އެކި ގުރޫޕުތަކުގެ އިހުމާލުން ނުފުރި ތިބި އެހެން ފަރާތްތަކަށްވެސް ފުރުސަތު ހޯދައިދިނުމަށް، އިސްލާމިކް މިނިސްޓްރީ އާއި ހައްޖު ކޯޕަރޭޝަން އަދި މޯލްޑިވިއަން ގުޅިގެން ޚާއްސަ މަސައްކަތްތަކެއް ވަނީ ފަށާފައެވެ.
މިކަމާ ގުޅޭގޮތުން އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވީ، އުމްރާއަށް ފުރަން ބޭނުންވެފައި ތިބި 150 މީހުން ފާހަގަކުރެވިފައިވާ ކަމަށާއި، ފްލައިޓެއް ޗާޓަރު ކުރެވިއްޖެނަމަ ޖާގަ އޮތް މިންވަރަކުން އެންމެން ފުރުވާލުމަށް މަސައްކަތް ކުރައްވާނެ ކަމަށެވެ. ހައްޖު ކޯޕަރޭޝަނުން ވެސް ވަނީ ދިމާވި ދަތިތަކާ ހުރެ ނުފުރި ތިބި ފަރާތްތަކަށް ޚާއްޞަ އިންތިޒާމުތަކެއް ހަމަޖެއްސުމަށް މަސައްކަތް ކުރަމުންދާކަން ހާމަކޮށްފައެވެ.
ކޮމެންޓު ފޮނުވާ