މިއަހަރުގެ ސްޓޫޑެންޓް ލޯނަށް އެދުމުގެ ފުރުސަތު، ވަކި މުއްދަތެއް ކަނޑަނާޅައި އަންނަ ހަފްތާގައި ހުޅުވާލުމަށް ތައްޔާރުވަމުންދާ ކަމަށް ހަޔާ އެޑިޔުކޭޝަން މިނިސްޓަރު ޑރ. އަލީ ހައިދަރު ވިދާޅުވެއްޖެއެވެ.
ނޫސްވެރިންނާ ބައްދަލުކުރައްވައި މިނިސްޓަރު ވިދާޅުވީ، ލޯނަށް އެދުމަށް ޚާއްސަ ޕޯޓަލް ތައްޔާރުކުރުމާއި އުސޫލުތައް އެކުލަވާލުމުގެ މަސައްކަތް މިހާރު ކުރިއަށްދާ ކަމަށެވެ. މިފަހަރު ގެންނަ އެންމެ ބޮޑު ބަދަލަކީ، ކުރީ އަހަރުތަކެކޭ ޚިލާފަށް އެޕްލިކޭޝަން ހުށަހެޅުމަށް ވަކި ސުންގަޑިއެއް ނުވަތަ ޑެޑްލައިނެއް ކަނޑައަޅާފައި ނުވުމެވެ. މީގެ ބޭނުމަކީ ވަކި މުއްދަތެއްގެ ތެރޭގައި ހުށަހަޅަން ޖެހުމުން ދަރިވަރުންނަށް ދިމާވާ ދަތިތަކާއި، މުއްދަތު ހަމަވުމުގެ ސަބަބުން އެޕްލައި ނުކުރެވުން ފަދަ ކަންކަމަށް ލުޔެއް ހޯދައިދިނުން ކަމަށް މިނިސްޓަރު ފާހަގަކުރެއްވިއެވެ.
މި ބަދަލާއެކު، ލޯނަށް އެދޭއިރު ދަރިވަރުން ތިބެންޖެހޭނީ ކިޔަވަން ފެށުމަށް ފުރިހަމައަށް ތައްޔާރުވެގެންނެވެ. އެގޮތުން ޕްލޭސްމަންޓް ލެޓަރާއި، އެމްކިއުއޭގެ ރެކޮގްނިޝަން ލިޔެކިޔުންތަކުގެ އިތުރުން، ލައިސަންސް ނަގައިގެން މަސައްކަތްކުރަންޖެހޭ ދާއިރާއެއްނަމަ ކަމާބެހޭ އިދާރާގެ ހުއްދަ އޮތް ކޯހެއްކަން އަންގައިދޭ ލިޔުން ހުށަހަޅަންޖެހޭނެއެވެ. އަދި ފީ ސްޓްރަކްޗާ ހުށަހެޅުމުން ލޯނުގެ ކަންކަން ހަމަޖެއްސުން އަވަސްވެގެންދާނެ ކަމަށް މިނިސްޓަރު ވިދާޅުވިއެވެ.
މިނިސްޓަރު އިތުރަށް ވިދާޅުވީ، މިދިޔަ އަހަރެކޭ އެއްގޮތަށް މިއަހަރުވެސް ލޯނު ދޫކުރާނީ އެޑްމިނިސްޓްރޭޓިވް ފީ ނުވަތަ އިތުރު ސާވިސް ޗާޖެއް ނުނަގާ ގޮތަށް ކަމަށެވެ. މިހާރު ކުރިއަށްދާ ބަންދު ދުވަސްތަކަށްފަހު ފެށޭ ހަފްތާގައި ލޯނަށް ހުޅުވާލާއިރު، ލިޔެކިޔުންތައް ހަމަކޮށް ފުރިހަމަ އެޕްލިކޭޝަނެއް ހުށަހެޅުމުން ލޯނު ހަމަޖެހިގެންދާނެ ކަމުގެ ޔަގީންކަން މިނިސްޓަރު ދެއްވިއެވެ.
ކޮމެންޓު ފޮނުވާ