ކުޑަކުދިންގެ މައްސަލަތަކުގައި ފުރަތަމަ މަރުހަލާގެ އެސެސްމަންޓް ފޯނުން ހެދޭގޮތަށް ގަވާއިދު ބަދަލުކޮށްފި

ކުޑަކުދިންނާ ގުޅޭ މައްސަލަތައް ހުށަހެޅުމުން، ކުއްޖާގެ ހާލަތު ދެނެގަތުމަށް ހަދަންޖެހޭ ފުރަތަމަ މަރުހަލާގެ އެސެސްމަންޓް ފޯނުން ގުޅައިގެން ހެދޭ ގޮތަށް "ކުޑަކުދިންނާ ގުޅޭ މައްސަލަ ބެލުމުގެ އުސޫލުތައް ކަނޑައެޅުމުގެ ގަވާއިދު" އިސްލާހުކޮށްފިއެވެ.

މިދިޔަ އާދިއްތަ ދުވަހު އާންމުކޮށްފައިވާ މި އިސްލާހުގައިވާ ގޮތުން، ޖެންޑާ މިނިސްޓްރީއަށް މައްސަލައެއް ހުށަހެޅުމާ އެކު އޮން-ކޯލް ކޭސް ވޯކަރު ހަދަންޖެހޭ "އިނީޝިއަލް ސްކްރީނިން އެސެސްމަންޓް" ދެން ހަދަން ޖެހޭނީ ފޯނު މެދުވެރިކޮށް މައުލޫމާތު ހޯދައިގެންނެވެ. މީގެ ކުރިން މި އެސެސްމަންޓް ހަދަން ޖެހެނީ ކުއްޖާއާ ސީދާ ބައްދަލުކޮށް މައުލޫމާތު ހޯދުމަށް ފަހުގައެވެ. ނަމަވެސް އާ އިސްލާހާއެކު، މައްސަލަ ހުށަހަޅާތާ 24 ގަޑިއިރުގެ ތެރޭގައި ފޯނުން މައުލޫމާތު ސާފުކޮށް، ކުއްޖާއާ ބައްދަލު ނުކޮށްވެސް މި އެސެސްމަންޓް ހެދިދާނެއެވެ.

ކުއްޖާއާ ސީދާ ބައްދަލުކޮށް އެސެސްމަންޓް ހަދަން ޖެހޭނީ ހަމައެކަނި ފޯނުން ގުޅައިގެން އެކަށީގެންވާ މައުލޫމާތު ނުލިބޭ ހާލަތްތަކުގައެވެ. މިގޮތަށް ކުއްޖާއާ ބައްދަލުކުރަން ދާންޖެހޭ ރަށަކަށް، މަގުބޫލު ސަބަބަކާހުރެ 24 ގަޑިއިރު ތެރޭގައި ނުދެވިއްޖެނަމަ، އެސެސްމަންޓް ހެދުމަށް 72 ގަޑިއިރުގެ މުއްދަތެއް ލިބޭނެ ކަމަށްވެސް ގަވާއިދުގައި ބަޔާންކޮށްފައިވެއެވެ. މައްސަލައެއްގެ ގޮތުގައި ރަޖިސްޓްރީ ކުރާނީ މި އެސެސްމަންޓަށްފަހު އިތުރު މައުލޫމާތު ބޭނުންވާނަމަ ނުވަތަ ކުއްޖާގެ ރައްކާތެރިކަން ކަށަވަރުނުވާނަމައެވެ. އެހެން ނޫންނަމަ މައްސަލަ ނިމުނީ ކަމަށް ބެލޭނެއެވެ.

މީގެ އިތުރުން، ފުރަތަމަ މަރުހަލާގެ އެސެސްމަންޓަށްފަހު ހަދަންޖެހޭ "ކޮމްޕްރިހެންސިވް އެސެސްމަންޓް" ފުރިހަމަ ކުރުމުގެ މުއްދަތު ވަނީ 7 ދުވަހުން 14 ދުވަހަށް އިތުރުކޮށްފައެވެ. އަދި ފުލުހުންނަށް މައްސަލަ ހުށަހެޅުމުގައި އަމަލުކުރާ ގޮތަށްވެސް ވަނީ ބަދަލުތަކެއް ގެނެސްފައެވެ. އެގޮތުން ސަރުކާރު ބަންދު ދުވަހެއްގައި މައްސަލައެއްގެ ރިފަރަލް ހަދަން ޖެހިއްޖެނަމަ، ފޯނުން ގުޅައި ވަގުތުން ފުލުހުންނަށް އެންގުމަށްފަހު، ލިޔުމުން ރިފަރަލް ފޮނުވުމަށް 72 ގަޑިއިރު ލިބޭނެއެވެ. ކުރިން އޮންނަ ގޮތުންނަމަ 24 ގަޑިއިރު ތެރޭގައި ރިފަރަލް ފޮނުވަން ޖެހެއެވެ.

ޖެންޑާ މިނިސްޓްރީއަށް ހުށަހަޅާ މައްސަލަތަކުގެ ތެރޭގައި ޖިންސީ ގޯނާ، އިހުމާލުވުން، އަދި ގެވެށި އަނިޔާ ފަދަ މައްސަލަތައް ހިމެނޭއިރު، ފާއިތުވި މަހު އެކަނިވެސް ކުޑަކުދިންނާ ގުޅޭ 200 އަށްވުރެ ގިނަ މައްސަލަ ރިޕޯޓުކޮށްފައިވާކަން ތަފާސްހިސާބުތަކުން ދައްކައެވެ.