މެދުއިރުމަތީގައި މިހާރު ހިނގަމުންދާ ހަނގުރާމައިގެ ސަބަބުން ދިވެހި އުމްރާވެރިންނަށް ދިމާވެދާނެ ކުއްލި ޙާލަތަކާ ގުޅިގެން އެހީތެރިކަން ފޯރުކޮށްދިނުމަށް އިސްލާމިކް މިނިސްޓްރީން ޚާއްޞަ ހޮޓްލައިނެއް ތަޢާރަފުކޮށްފިއެވެ.
އެމެރިކާއާއި އިޒްރޭލުން ގުޅިގެން އީރާނަށް ދިން ވަރުގަދަ ޙަމަލާތަކުގެ ބަދަލު ހިފުމުގެ ގޮތުން، އީރާނުން ދަނީ ގަލްފުގެ ޤައުމުތަކުގައި ހުރި އެމެރިކާގެ މަރުކަޒުތަކަށް އަމާޒުކޮށް ޙަމަލާތައް ދެމުންނެވެ. މި ޙަމަލާތަކުގެ އަސަރު ސަޢޫދީ ޢަރަބިއްޔާއަށްވެސް ކުރަމުންދާތީ، އުމްރާގެ އަޅުކަމަށް ގޮސް ތިބި އަދި ދަތުރުކުރަމުންދާ ދިވެހިންނަށް އެއްވެސް ކަމެއް ދިމާވެއްޖެނަމަ ގުޅުމަށް މިނިސްޓްރީން ހަމަޖައްސާފައިވާ ނަންބަރަކީ 3007070 އެވެ. ރާއްޖެއިން ބޭރުން ގުޅުއްވާނަމަ ގުޅުއްވާނީ +9603007070 އަށެވެ.
މި ސަރަޙައްދުގެ މަސްރަހު އާދަޔާ ޚިލާފަށް ހޫނުވެފައިވުމާއެކު، މެދުއިރުމަތީގެ ބައެއް ޤައުމުތަކުގެ ވައިގެ ސަރަޙައްދު ވަނީ ވަގުތީ ގޮތުން ބަންދުކޮށްފައެވެ. މީގެ ސަބަބުން ސަޢޫދީ ޢަރަބިއްޔާ ހިމެނޭހެން އެ ސަރަޙައްދުގެ ވައިގެ ދަތުރުތަކަށް ބަދަލުތަކެއް އައިސްފައިވާތީ، މައްކާގައި މިވަގުތު ތިބި ދިވެހިންނާއި އެ ޤައުމަށް ދަތުރުކުރާ ފަރާތްތަކުން މިކަމަށް ސަމާލުވެ، ކަމެއް ދިމާވެއްޖެ ޙާލަތެއްގައި ލަސްނުކޮށް މިނިސްޓްރީގެ ހޮޓްލައިނަށް ރިޕޯޓުކުރުމަށް އެ މިނިސްޓްރީން ވަނީ އިލްތިމާސްކޮށްފައެވެ.
ކޮމެންޓު ފޮނުވާ