ކެޕިޓަލް މާކެޓް ޑިވެލޮޕްމަންޓް އޮޓޯރިޓީ، ސީއެމްޑީއޭގެ ޗެއަރޕަރސަންގެ މަޤާމަށް ކުރީގެ ޑެޕިއުޓީ ގަވަރުނަރު އާއިޝަތު ޒާހިރާ އައްޔަން ކުރައްވައިފިއެވެ.
ސީއެމްޑީއޭގެ ޗެއަރޕަރސަންގެ މަޤާމަށް އައިޝަތު ޒާހިރާ އައްޔަންކުރައްވާފައިވަނީ އިއްޔެއިން ފެށިގެންނެވެ. ޒާހިރާ އަކީ އެމްއެމްއޭގައި 31 އަހަރު ހިދުމަތް ކުރައްވާފައިވާ ބޭކަނަބަލެކެވެ. އަދި އެމްއެމްއޭ އިން ވަކިވެވަޑައިގަތީ ޑެޕިއުޓީ ގަވަރުނަރުގެ މަޤާމުގައި 2 ދައުރު ފުރިހަމަ ކުރައްވާފައެވެ.
ދިވެހިރާއްޖޭގެ މާލީ ސެކިއުރިޓީއާބެހޭ ޤާނޫނު ގައި ވާގޮތުގެ މަތިން ސީއެމްޑީއޭގެ ޑިރެކްޓަރުންގެ ބޯޑުގެ މެންބަރުން އައްޔަންކުރައްވަނީ ވަޒީރުންގެ މަޖިލީހުގެ މަޝްވަރާގެ މަތިން ރައީސުލްޖުމްހޫރިއްޔާއެވެ.
ސީއެމްޑީއޭގެ ބޯޑުގައި މިވަގުތު ތިއްބެވި ބޭފުޅުން:
- އައިޝަތު ޒާހިރާ – ބޯޑުގެ ޗެއަރޕަރސަން
- އައިޝަތު ނާދިޔާ – އެމްއެމްއޭ ތަމްސީލް ކުރައްވާ މެމްބަރު
- އަޙްމަދު ސިރާޖް – ފިނޭންސް މިނިސްޓްރީ ތަމްސީލްކުރައްވާ މެމްބަރު
- މަރިޔަމް ވިސާމް – ރެޖިސްޓްރަރ އޮފް ކޮންޕެނީޒް
- ފާތިމަތު ޝަފްނީޒް – ޕްރައިވެޓް ސެކްޓަރ ތަމްސީލްކުރައްވާ މެމްބަރު
- ރިފާޢަތު ޖަލީލް – ޕްރައިވެޓް ސެކްޓަރ ތަމްސީލްކުރައްވާ މެމްބަރު
ސީއެމްޑީއޭގެ ބޯޑުގެ ޗީފް އެގްޒެކްކެޓިވް އޮފިސަރގެ މަގާމު މިވަގުތު އޮތީ ހުސްކޮށެވެ. އެ އޮތޯރިޓީގެ ސީއީއޯގެ މަގާމުގައި އެންމެ ފަހުން ހުންނެވި ނާދިޔާ ހަސަން މަގާމުން އިސްތިއުފާދެއްވީ 2019 ވަނަ އަހަރު އެވެ.
