ދުނިޔޭގެ އެންމެ އުސް އެއް އިމާރާތް ކަމަށްވާ ޓައިޕޭ 101 އަށް، އެއްވެސް ކަހަލަ ވާގަނޑެއް ނުވަތަ ރައްކާތެރިކަމުގެ އާލާތެއް ބޭނުންކުރުމެއް ނެތި، މަޝްހޫރު ކްލައިމްބަރ އެލެކްސް ހޮނޯލްޑް އަރައި ތާރީޚީ ކާމިޔާބީއެއް ހޯދައިފިއެވެ.
މިއަދު (25 ޖެނުއަރީ 2026) ވީ އާދީއްތަ ދުވަހުގެ ހެނދުނު، މޫސުން ރީތި ވަގުތެއްގައި ކުރިއަށްދިޔަ މި ނުރައްކާތެރި ހަރަކާތުގައި، އުމުރުން 40 އަހަރުގެ ހޮނޯލްޑް ވަނީ 92 މިނެޓުގެ ތެރޭގައި 508 މީޓަރު (1,667 ފޫޓު) ގެ އުސްމިނަށް އަރާފައެވެ. މިއީ މި އިމާރާތަށް "ފްރީ ސޯލޯ" ކޮށް (ރައްކާތެރިކަމުގެ އާލާތަކާ ނުލައި، ހަމައެކަނި އަތާއި ފައިގެ ބޭނުންކޮށްގެން) މީހަކު އެރި ފުރަތަމަ ފަހަރެވެ.
ނެޓްފްލިކްސް އިން މުޅި ދުނިޔެއަށް ލައިވްކޮށް ދެއްކި މި ހަރަކާތަކީ ހޮނޯލްޑް ސިފަކުރި ގޮތުގައި "އެންމެ ބޮޑު އާބަން ފްރީ ސޯލޯ" ކްލައިމްބެވެ. ހޮނޯލްޑް ދުނިޔެއަށް މަޝްހޫރުވެފައިވަނީ 2017 ވަނަ އަހަރު އެމެރިކާގެ 'އެލް ކެޕިޓަން' ފަރުބަދައަށް ވާގަނޑަކާ ނުލައި އެރުމުންނެވެ.
މީގެ ކުރިން 2004 ވަނަ އަހަރު ފަރަންސޭސިވިލާތުގެ އެލެން ރޮބަރޓް ވަނީ ޓައިޕޭ 101 އަށް އަރާފައެވެ. ނަމަވެސް އޭނާ އެރީ ވާގަނޑު ބޭނުންކޮށްގެންނެވެ. އަދި އެދުވަހު މޫސުން ގޯސްވުމުގެ ސަބަބުން އޭނާއަށް 4 ގަޑިއިރު ހޭދަވިއިރު، މޫސުން ރީތި ދުވަހެއްގައި ހޮނޯލްޑް މިކަން ނިންމާލީ އެންމެ ދޮޅުގަޑިއިރުންނެވެ.
ހޮނޯލްޑް އިމާރާތުގެ ބޭރުން މައްޗަށް އަރަމުން ދިޔައިރު، އޭނާގެ އަންހެނުން ސަނީ މެކްކެންޑްލެސް ހުރީ އިމާރާތުގެ އެތެރޭގައި ބިރުން ފިތްކަނޑައިގެންދާ ހާލުގައެވެ. ކާމިޔާބުކަމާއެކު ނިންމާލުމުން އޭނާ ބުނީ މުޅި ވަގުތު ހޭދަކުރީ "ޕެނިކް އެޓޭކެއް" ގައި ކަމަށެވެ.
ޓައިވާންގެ ރައީސް ލައި ޗިންގް-ތެ ވެސް ވަނީ މި ކާމިޔާބީއަށް މަރުހަބާ ވިދާޅުވެފައެވެ. ކްލައިމްބިން ނިންމާލުމަށްފަހު ހޮނޯލްޑް ބުނީ މިއީ ވަރަށް އުފާވެރި ދުވަހެއް ކަމަށާއި، މިކަމުން އެހެން މީހުންނަށް ވެސް ހިތްވަރު ލިބޭނެ ކަމަށް އުއްމީދުކުރާ ކަމަށެވެ.
ކޮމެންޓު ފޮނުވާ