މާލެ އަތޮޅު އެނބޫދޫފިނޮޅު ކައިރިން މުދާ އުފުލާ ދޯންޏެއް ބަންޑުން ޖަހާލައި ހިނގި ހިތާމަވެރި ހާދިސާއެއްގައި ދޯނީގެ ކެޕްޓަން މަރުވެ، އިތުރު މީހަކު ގެއްލިފައިވާއިރު، ކަނޑަށް އެޅިފައިވާ މުދާތައް އޮޔާދާތީ ދަތުރުވެރިން ސަމާލުވުމަށް ދިވެހި ފުލުހުންގެ ޚިދުމަތުން އިލްތިމާސްކޮށްފިއެވެ.
މިއަދު ހެނދުނު 7:27 ހާއިރު ރިޕޯޓުކޮށްފައިވާ މި ހާދިސާގައި ބަންޑުން ޖަހާލާފައިވަނީ ހުޅުމާލެއިން ފުރައިގެން ދޮންމާގާއަށް ދަތުރުކުރަމުންދިޔަ "ބަލަމާ 6″ ނަމަކަށް ކިޔާ ދޯންޏެކެވެ. މި ހާދިސާ ހިނގާފައިވަނީ ވާދޫ ކަނޑުގެ ތާޖް އެގްޒޯޓިކާ ރިޒޯޓު (އެނބޫދޫފިނޮޅު) ކައިރިއަށެވެ. މި ދޯނިން ޖުމްލަ ހަތަރު މީހުން ދަތުރުކުރިއިރު، އޭގެ ތެރެއިން ދެ މީހަކު ވަނީ ސަލާމަތްކުރެވިފައެވެ. ނަމަވެސް، ދޯނީގެ ކެޕްޓަން މަރުވެފައި އޮއްވާ ފެނިފައިވާއިރު، އޭނާއަކީ ދިވެއްސެއް ކަމަށް މައުލޫމާތު ލިބެއެވެ. މީގެ އިތުރުން، އެ ދޯނިން ދަތުރުކުރި ބިދޭސީ ފަޅުވެރިއެއް ހޯދުމުގެ މަސައްކަތް ކަމާބެހޭ ފަރާތްތަކުން އަދިވެސް އަންނަނީ ކުރަމުންނެވެ.
މި ހާދިސާއާ ގުޅިގެން ފުލުހުން ވަނީ ކަނޑުދަތުރުކުރާ ފަރާތްތަކަށް ޚާއްސަ ސަމާލުކަމެއް ދިނުމަށް އެދިފައެވެ. އެގޮތުން، އެމްއެންޑީއެފް ކޯސްޓްގާޑާ ހަވާލާދީ ފުލުހުން ހާމަކުރި ގޮތުގައި، ދޯނި ބަންޑުން ޖަހާލުމުގެ ސަބަބުން ކަނޑަށް އެޅިފައިވާ މުދާތައް ހުޅަނގަށް އޮޔާ ދާކަމަށް ލަފާކުރެވޭތީ، އެ ސަރަހައްދުން ދަތުރުކުރާ އުޅަނދުފަހަރުން އެކަމަށް ވިސްނައިގެން ދަތުރުކުރުމަށް ވަނީ އިލްތިމާސްކޮށްފައެވެ. މި ހާދިސާއާ ގުޅޭ އިތުރު ތަފްސީލެއް ފުލުހުންނާއި ސިފައިން އަދި ހާމަކޮށްފައެއް ނުވެއެވެ.
ކޮމެންޓު ފޮނުވާ