މަކަރާއި ހީލަތުން ފައިސާ ހޯދުމާއި، ލިބޭ އާމްދަނީއަށް ވާނުވާ ނޭނގޭކަމަށް ތުހުމަތުކޮށް، ރާއްޖޭގެ މިއުޒިކީ ބޭންޑެއް ކަމަށްވާ '2 އޮފް އަސް' ގެ ގިނަ އަދަދެއްގެ މެމްބަރުން އެ ބޭންޑާ ވަކިވެއްޖެއެވެ. މިކަން ހާމަކޮށްފައިވަނީ އިއްޔެ އެ މެމްބަރުން ސޯޝަލް މީޑިއާގައި އާންމުކުރި ބަޔާންތަކެއްގައެވެ.
ބޭންޑުން ވަކިވިކަން އިއުލާންކުރި މެމްބަރުންގެ ތެރޭގައި ހިމެނެނީ އަޙްމަދު ޝަހީދު (ޝަހީދު ލެގަސީ)، އަޙްމަދު ޖަޝީމް އަދި މުޙައްމަދު ޙިސާމްއެވެ. މީގެ އިތުރުން، މިދިޔަ އޮކްޓޫބަރު މަހުގެ ތެރޭގައި ބޭންޑުން ވަކިވި މުޙައްމަދު ނަސޫހު ވެސް ވަނީ ޖަޝީމް އާއި ޙިސާމްއާ ގުޅިގެން ނެރުނު ބަޔާނުގައި ބައިވެރިވެފައެވެ. މިއުޒިކީ ދާއިރާގައި 25 އަހަރުގެ ތަޖުރިބާ ހުރި ޝަހީދު ނެރުނު ވަކި ބަޔާނެއްގައި ބުނެފައިވަނީ، ބޭންޑުން ވަކިވާން ނިންމީ ވަރަށް އުނދަގޫ ނިންމުމަކަށް ފަހުގައި ކަމަށާއި، ނަމަވެސް މިއުޒިކް ކޮމިއުނިޓީއަށް ނޭދެވޭ އަސަރުކުރާ ފަދަ ކަންތައްތަކެއް ހުރުމުން އެކަން ހާމަކުރަން ޖެހޭ ކަމަށެވެ.
ޝަހީދު ފާހަގަކުރި ގޮތުގައި ބޭންޑުގައި ޕްރޮފެޝަނަލް ކުރިއެރުމެއް ނެތުމާއި، އެކަކު އަނެކަކަށް ކުރަންޖެހޭ އިޙްތިރާމް ކުޑަވުމުގެ އިތުރުން، ބޭންޑު ހިންގަނީ އެންމެ މީހަކު ބޭނުންވާ ގޮތަށް "ވަން މޭން ޝޯ" އެއްގެ ގޮތުގައެވެ. އަދި އޭނާގެ ދިގު މުއްދަތުގެ މިއުޒިކީ ތަޖުރިބާގެ އަގުވަޒަން ނުކުރުމަކީ އެންމެ ބޮޑު މާޔޫސްކަން ލިބުނު ކަންތައް ކަމަށާއި، ބޭންޑާއެކު ފެށި އުންމީދީ ދަތުރު ނޭދެވޭ ކަންކަމުގައި ތާށިވެ، އެ މައްސަލަތައް ހައްލުނުވެ ބޮޑުވުމުން ވަކިވީކަމަށް އޭނާ ބުނެފައިވެއެވެ. ނަމަވެސް ބެޓްލް އޮފް ބޭންޑްސް އިންޓަނޭޝަނަލްގައި ބޭންޑާއެކު ހޯދި ކާމިޔާބީއާމެދު ފަޚުރުވެރިވާކަމަށް ޝަހީދު ބުންޏެވެ.
ޖަޝީމް، ޙިސާމް އަދި ނަސޫހު ގުޅިގެން ނެރުނު ބަޔާނުގައި، ބޭންޑުގެ ހިންގުމުގައި ހުރި މައްސަލަތަކުގެ އިތުރުން މާލީ ކަންކަމުގައި ހުރި ނުސާފުކަން ވަނީ ފާހަގަކޮށްފައެވެ. އެގޮތުން ފައިސާގެ މުއާމަލާތްތަކުގެ ވާނުވާ ނޭނގުމާއި، މެމްބަރުންނަށް ލިބެންޖެހޭ ފައިސާ ބަރާބަރަށް ނުލިބޭ މައްސަލަ އެ ބަޔާނުގައި ތުހުމަތުކޮށްފައިވެއެވެ. އަދި ބޭންޑެއްގެ ރޫހާ ޚިލާފަށް ބޭންޑު ހިންގަމުން ދިއުމާއި، އަމިއްލަ އުފެއްދުންތަކެއް ނެތްކަން ވެސް އެ މެމްބަރުން ފާހަގަކޮށްފައިވެއެވެ.
މި ބަދަލުތަކާއެކު، ބެޓްލް އޮފް ބޭންޑްސް އިންޓަނޭޝަނަލްގައި ފެނުނު '2 އޮފް އަސް' ގެ ލައިންއަޕްގައި ހިމެނުނު 5 މެމްބަރުންގެ ތެރެއިން 3 މެމްބަރުން މިވަނީ ވަކިވެފައެވެ. މިހާރު ބޭންޑުގައި ބާކީ ތިބީ އަޙްމަދު އަދުހަމް އާއި ޢަބްދުﷲ ޝަމްރޫހު އެކަންޏެވެ. ފާހަގަކޮށްލެވޭ ގޮތުގައި މީގެ ތެރެއިން އަދުހަމްގެ މައްޗަށް ފައިސާއަށް ޚިޔާނާތްތެރިވުމާއި، މީހުން ލައްވާ މަސައްކަތް ކުރުވުމަށްފަހު ފައިސާ ނުދޭކަމުގެ ތުހުމަތުތަކެއް މީގެ ކުރިންވެސް ސޯޝަލް މީޑިއާގައި ފެންމަތިވެފައިވެއެވެ.
ކޮމެންޓު ފޮނުވާ