ދިވެހިރާއްޖޭގެ އީސްޕޯޓްސް އޯގަނައިޒޭޝަނެއް ކަމަށްވާ ލޯޔަލްޓީ ފަސްޓް އީސްޕޯޓްސް (އެލްއެފް އީ-ސްޕޯޓްސް) އިން، ޕާކިސްތާނުގެ މަޝްހޫރު އާރް3ޖިސައިޑް ޓީމު އެ އޯގަނައިޒޭޝަނަށް ސޮއިކުރުވައިފިކަން ރަސްމީކޮށް އިޢުލާންކޮށްފިއެވެ. މިއީ ދިވެހި އޯގަނައިޒޭޝަނަކުން ބައިނަލްއަޤުވާމީ ވާދަވެރި ގޭމިންގެ ދާއިރާގައި މިހާތަނަށް އެޅި އެންމެ ބޮޑު އަދި އެންމެ ތާރީޚީ ފިޔަވަޅެވެ.
މި އެއްބަސްވުމުގެ ދަށުން، ދެކުނު އޭޝިއާ ސަރަޙައްދުގައި ބޮޑެތި ކާމިޔާބީތަކެއް ހޯދާފައިވާ އާރް3ޖިސައިޑްގެ މުޅި ލައިންއަޕް މިހާރު ވަނީ ދިވެހި ދިދައިގެ ދަށަށް އައިސްފައެވެ. މިއީ ބައިނަލްއަޤުވާމީ އީސްޕޯޓްސް މައިދާނުގައި ރާއްޖެއިން ގެންގުޅޭ އާ އަމާޒުތަކާއި ފެންވަރު ދައްކުވައިދޭ މުހިންމު ފެށުމެކެވެ.
"ޕަބްޖީ މޯބައިލް ރޮސްޓަރ 2026″ ގެ ނަމުގައި ނެރުނު ރަސްމީ ވީޑިއޯއެއްގައި، އެލްއެފް އީ-ސްޕޯޓްސް އިން ވަނީ ވަފާތެރިކަމާއި، އިތުބާރާއި، އަދި ބުރަ މަސައްކަތުގެ މެސެޖަކާއެކު އެ ޓީމުގެ ކުޅުންތެރިން ތަޢާރަފުކޮށްފައެވެ. މި ޓީމުގައި ހިމެނޭ ފަސް ކުޅުންތެރިންނަކީ ޕިންކްމެން، ސީނިއާ، ރޮޝާން، ވާޒް އަދި ޝާކާއެވެ. އެ އޯގަނައިޒޭޝަނުން ބުނި ގޮތުގައި މި ޓީމު 2026 ވަނަ އަހަރާ ކުރިމަތިލަނީ އީސްޕޯޓްސްގައި "ބިނާކުރަނިވި ތާރީޚެއް" އުފެއްދުމުގެ ވަރުގަދަ އަޒުމުގައެވެ.
އާރް3ޖިސައިޑް އަކީ ސަރަޙައްދީ އެންމެ މަތީ ފަންތީގެ މުބާރާތްތައް ކަމަށްވާ ޕަބްޖީ މޮބައިލް ސުޕަ ލީގު (ޕީއެމްއެސްއެލް) ސެންޓްރަލް އެންޑް ސައުތު އޭޝިއާގައި ވާދަކޮށްފައިވާ ޓީމެކެވެ. މީގެ އިތުރުން އެ ޓީމަކީ ޕީއެމްއެންސީ ޕާކިސްތާން ސްޕްރިންގް 2025 ގެ ރަނަރަޕް ޓީމެވެ. މިފަދަ ތަޖުރިބާކާރު ޓީމެއް ދިވެހި ކުލަބަކުން މިލްކުކުރުމަކީ، މުޅިން އަލުން ޓީމެއް ބިނާކުރުމުގެ ބަދަލުގައި، ބައިނަލްއަޤުވާމީ މުބާރާތްތަކުގެ ޕްރެޝަރާއި ވާދަވެރިކަމަށް ތައްޔާރުވެފައި އޮތް ވަރުގަދަ ބިންގަލެއް ލިބިގެންދިޔަ ކަމެކެވެ.
ވޭތުވެދިޔަ އަހަރުތަކުގައި ރާއްޖޭގައި ގޭމިންއަށް އޮތް ޝައުޤުވެރިކަން އިތުރުވެފައިވީ ނަމަވެސް، ދިވެހި އޯގަނައިޒޭޝަނަކުން މިފަދަ ސަރަޙައްދީ ފެންވަރުގެ ޓީމެއް ހޯދުމަކީ މީގެ ކުރިން ފެނިފައިނުވާ ފަދަ ބޮޑު ކުރިއެރުމެކެވެ. މިއީ ދެކުނު އޭޝިއާގެ އީސްޕޯޓްސްގައި ރާއްޖެއަކީ ހަމައެކަނި ބަލަން އޮންނަ ފަރާތެއް ނޫންކަން ސާބިތުކޮށްދިނުމަށް ދިން ވަރުގަދަ މެސެޖެކެވެ.
މި ބަދަލާއެކު، އީސްޕޯޓްސްގެ ތަފާސްހިސާބުތައް ބަލަހައްޓާ ބައިނަލްއަޤުވާމީ ސައިޓްތަކުން މިހާރު ވަނީ މި ފަސް ކުޅުންތެރިންނަކީ އެލްއެފް އީ-ސްޕޯޓްސްގެ ރަސްމީ ކުޅުންތެރިންގެ ގޮތުގައި ހިމަނާފައެވެ. މީގެ ސަބަބުން ބައިނަލްއަޤުވާމީ މައިދާނުގައި ދިވެހި އީސްޕޯޓްސްއަށް އޮތް ސަމާލުކަން އިތުރުވެ، ސްޕޮންސަރުން ލިބުމަށް މަގުފަހިވެ، އަދި ރާއްޖޭގެ ޒުވާން ކުޅުންތެރިންނަށް މަތީ ފަންތީގެ މުބާރާތްތަކަށް އަމާޒުހިފުމަށް ބޮޑު ހިތްވަރަކަށް ވެގެންދާނެއެވެ.
ދިވެހި ސަޕޯޓަރުންގެ މެދުގައި މިހާރުވެސް ބޮޑު ފޯރިއެއް އުފެދިފައިވާއިރު، ގިނަ ބަޔަކު ދެކޭގޮތުގައި މިއީ ދެކުނު އޭޝިއާގެ ޕަބްޖީ މޮބައިލް މައިދާނުގައި ދިވެހި ކުލަބަކުން ފުރަތަމަ ފަހަރަށް ވަރުގަދަ ގޮންޖެހުމެއް ކުރިމަތިކުރުވާނެ ތާރީޚީ ބަދަލެކެވެ.
ކޮމެންޓު ފޮނުވާ