ކުދިންނަށް ޖިންސީ ގޯނާކުރި ކަމުގެ ތުހުމަތުގައި ފުލުހުންގެ ހައްޔަރުގައި ހުރި ޓްރެވަލް ގައިސް ޕްރައިވެޓް ލިމިޓެޑްގެ ވެރިޔާ ސަނީ އުމަރުގެ ގެ ކޯޓު އަމުރެއްގެ ދަށުން އޭނާގެ ހާޒިރުގައި މާލޭގައި އޭނާ ދިރިއުޅޭ އެޕާޓްމަންޓް މިއަދު ފުލުހުން ބަލައިފާސްކޮށްފިއެވެ.
މި މައްސަލާގައި އަނިޔާ ލިބުނު ކުދިންގެ އާއިލާތަކުން ފުލުހުންނަށް މައްސަލަ ހުށަހެޅުމުން ސަނީ އުމަރު ވަނީ ކުރިން އިންޑިއާއަށް ފިލައިގެން ގޮސްފައެވެ. އޭނާ ހައްޔަރުކޮށްފައިވަނީ ރާއްޖެއިން ބޭރަށް ދެވަނަ ފަހަރަށް ފުރަން ގޮސް ހުއްޓައި މި މަހުގެ 2 ވަނަ ދުވަހުއެވެ. އާއިލާތަކުން ބުނާ ގޮތުގައި މީގެ 10 އަހަރު ކުރިން ފެށިގެން އެކި ގޮތްގޮތުން އޭނާދިޔައީ އާއިލާގެ ކުދިންނަށް ޖިންސީ ގޯނާ ކުރަމުންނެވެ، އަދި އޭގެ ސަބަބުން، ބައެއް ކުދިންނަށް ވަރަށް ބޮޑަށް ނަފުސާނީ އަސަރު ކޮށްފައިވާ ކަމަށްވެސް އާއިލާތަކުން ބުނެފައި ވެއެވެ.
އޭނާގެ ހިއްސާ އޮންނަ ޓްރެވަލް ގައިސް ކުންފުނިން ބުނެފައިވަނީ އޭނާގެ މައްސަލަ ތަހުގީގު ކުރުމުގައި ފުލުހުންނަށް ފުރިހަމަ އެއްބާރުލުން ދޭނެ ކަމަށެވެ. އަދި ކުންފުނީގައި އޮތް އޭނާގެ ހިއްސާތައް އަތުލުމުގެ މަސައްކަތް ކުރާކަމަށްވެސް ބުނެފައި ވެއެވެ. އެ ކުންފުންޏަކީ ހަލާލް ޓޫރިޒަމް ބްރޭންޑުގެ ދަށުން ހިންގާ ކުންފުންޏެކެވެ. ކުންފުނިން ޓްރެވަލް އެޖެންސީއެއް ހިންގުމުގެ އިތުރުން މީޑިއާވެސް ހިންގާ ފާމެކެވެ.
ކޮމެންޓު ފޮނުވާ