ސްކޫލް ބަންދު ދުވަސްތަކުގައި ގިނަ އަދަދެއްގެ ދިވެހީން އުމްރާއަށް ދަތުރުކުރަމުން އަންނައިރު، އަޅުކަމުން އެނބުރި އައިސް ބަލިތަކުން ރައްކާތެރިވުމަށް ސަމާލުވުމަށް ހެލްތު ޕްރޮޓެކްޝަން އެޖެންސީއިން އިލްތިމާސްކޮށްފިއެވެ. އާންމުކޮށް އަޅުކަމުން އައިސް ރޯގާ ޖެހި، އަރިދަފުސް ބަލިތަކާ ކުރިމަތިލާ މީހުންގެ އަދަދު ބޮޑުވާތީ، އެޗްޕީއޭއިން ވަނީ ރައްކާތެރިކަމުގެ ފިޔަވަޅުތައް އަޅަން ގޮވާލާފައެވެ.
އެގޮތުން، ކެއްސުމުގައި އަނގަމައްޗާއި ނޭފަތް ނިވާކުރުން، މާސްކު އަޅައިގެން އުޅުން، ގިނަގިނައިން ސައިބޯނިލައިގެން އަތްދޮވުން ވަރަށް މުހިންމު ކަމަށް އެ އެޖެންސީން ވަނީ ބުނެފައެވެ. އަދި ރޯގާ ޖެހިފައިވާނަމަ، ގިނަ މީހުން އެއްވެ އުޅޭ ތަންތަނަށް ނުދިއުމާއި ކުޑަކުދިންނާ ދުރުގައި ހުރުމަށް އެޗްޕީއޭއިން އިލްތިމާސްކުރެއެވެ. އަޅުކަމުން އެނބުރި އައިސް 14 ދުވަހުގެ ތެރޭގައި ހުން، ކެއްސުން، ނޭވާލަން އުނދަގޫވުން ފަދަ އަލާމާތްތައް ފެނިއްޖެނަމަ، އަވަހަށް ޑޮކްޓަރަށް ދައްކައި، އަޅުކަމުން އައި މީހެއްކަން އަންގަން ވެސް އެ އެޖެންސީއިން ލަފާދީފައިވެއެވެ.
އިސްލާމިކް މިނިސްޓްރީގެ ތަފާސްހިސާބުތައް ދައްކާ ގޮތުން، ދެކުނު ޑިސެމްބަރު މަހާއި މި މަހު 7،726 ދިވެހީން އުމްރާއަށް ދިޔުމަށް ނިންމާފައިވާއިރު، އެ މީހުން އަންނަ ހަފުތާގައި އެނބުރި އަންނަން ފަށާނެއެވެ.
ކޮމެންޓު ފޮނުވާ