ސްޓްރޯކެއް ޖެހި އައިޖީއެމްއެޗްގެ އައިސީޔޫގައި ފަރުވާ ހޯދަމުންދާ ފިލްމީ ތަރި އަހުމަދު ނިމާލް ނިޔާވި ކަމަށް ސޯޝަލް މީޑިއާގައި ދަނީ ދޮގު ވާހަކަތައް ފެތުރެމުންނެވެ. މި ވާހަކަތައް ދޮގު ކުރައްވައި ނިމާލަށް ހެޔޮ ދުއާ ކޮށްދިނުމަށް އާއިލާއިން އެދިއްޖެ އެވެ.
ދެ ދުވަސް ކުރިން ސްޓްރޯކެއް ޖެހި ހާލު ދެރަވި ނިމާލަށް މިހާރު ފަރުވާ ދެމުން އަންނަނީ އައިޖީއެމްއެޗްގެ އައިސީޔޫގަ އެވެ. އެކަމަކު ރޭ ފެށިގެން އޭނާ ނިޔާވި ކަމަށް ބުނެ ގިނަ ބަޔަކު ދަނީ ސޯޝަލް މީޑިއާގައި ޕޯސްޓްތައް ކުރަމުންނެވެ. މިކަން ދިމާވީ ފިލްމު ޑައިރެކްޓަރަކު ލިޔުނު ޕޯސްޓަކާ ގުޅިގެން ކަމަށް ބެލެވެ އެވެ.
ނިމާލްގެ ދޮށި ފިރިހެން ދަރިފުޅު ޖުމައިލް ނިމާލް އާއި އާއިލާގެ އެހެން މެންބަރުން ވަނީ ސޯޝަލް މީޑިއާގައި އެ ދޮގު ވާހަކަތައް ދޮގުކޮށް، އުނދަގޫ މި ވަގުތު މިފަދަ އަސްލު ނޫން ވާހަކަތައް ނުފެތުރުމަށް އެދިފަ އެވެ. ނިމާލަށް ރޭގެ ވަގުތެއްގައި އޮޕަރޭޝަނެއް ވެސް ވަނީ ކޮށްފަ އެވެ. އާއިލާއިން ތިބީ އޮޕަރޭޝަނަށް ފަހު ހާލަތު ރަނގަޅުވެ، ޞިއްޙަތު ރަނގަޅުވަމުން އަންނާނެ ކަމަށް އުންމީދުކޮށްގެންނެވެ. އެހެންކަމުން ވީހާވެސް ގިނަ ބަޔަކު ނިމާލަށް ހެޔޮ ދުއާކޮށްދިނުމަށް އާއިލާއިން އެދިފައި ވެއެވެ.
ކޮމެންޓު ފޮނުވާ