ހެންވޭރުގައި ބޭއްވި އާއްމު ބައްދަލުވުމެއްގައި ސުޕްރީމް ކޯޓުގެ ފަނޑިޔާރު އައިޝާ ޝުޖޫނަށް ފުރައްސާރަކޮށް ދެއްކި ވާހަކަތައް ހިއުމަން ރައިޓްސް ކޮމިޝަނުން މިއަދު ކުށްވެރިކޮށްފި އެވެ. ރައީސް ޑރ. މުއިއްޒާ ރައްޔިތުން ބައްދަލުކުރުމަށް ކަލާފާނު ސްކޫލުގައި މި މަހުގެ 7 ވަނަ ދުވަހު ބޭއްވި ބައްދަލުވުމުގައި ޝެއިހް އިޔާޒް އަބްދުއްލަތީފްގެ ބައްޕާފުޅު އަބްދުއްލަތީފް އުމަރު ވަނީ ޝުޖޫން ބުރުގާ ނާޅުއްވައި ސުޕްރީމް ކޯޓުގައި އިންނަވާ ކަމަށް ބުނެ ފާޑުވިދާޅުވެފަ އެވެ.
އޭނާ ބުނީ އައުރަ ނިވާ ނުކޮށް އެ މަގާމުގައި ހުންނަން ބޭނުންނަމަ މަސާޖު ޕާލާ ފަދަ ތަންތަނަށް ދާން ޖެހޭ ކަމަށާއި އެ ތަންތަނުން ގިނަ ލާރި ހޯދަން ވަޒީފާ ލިބޭނެ ކަމަށެވެ. އެކަމަކު އެޗްއާރުސީއެމުން ނެރުނު ބަޔާނުގައި ބުނީ އިލްމީ އަދި ގާބިލް އަންހެން ބޭފުޅުންނަށް އަމާޒުކޮށް ޖިންސީ ފުރައްސާރައިގެ ސިފަ އެކުލެވޭ ބަސްމަގު ބޭނުންކުރުމަކީ އަންހެނުންގެ ކުރިއެރުމަށް އޮތް ހުރަހެއް ކަމަށެވެ. މިފަދަ ފުރައްސާރައިގެ ސަބަބުން ގައުމީ ހިދުމަތަށް ނުކުންނަން ބޭނުންވާ އަންހެނުންގެ ހިތްތަކުގައި ބިރުވެރިކަން އުފެދޭނެ ކަމަށް ވެސް ބުންޏެވެ.
ކޮމިޝަނުން ފާހަގަކުރި ގޮތުގައި ހިޔާލުފާޅުކުރުމުގެ މިނިވަންކަމަކީ އަނެކާގެ އަބުރަށް އަރައިގަތުމަށް އޮތް ހުއްދައެއް ނޫނެވެ. ދިވެހިރާއްޖޭގެ ޝަރުއީ ނިޒާމުގެ ބޭފުޅަކަށް ފުރައްސާރަކުރުމަކީ މުޅި ނިޒާމުގެ ހައިބަތާއި ކަރާމާތަށް އުނިކަން އަންނާނެ ކަމެއް ކަމަށް ބަޔާނުގައި ބުންޏެވެ. އަދި އާއްމު މަންސަތަކުގައި އިންސާނީ ކަރާމާތާއި އަނެކުންގެ ގަދަރަށް އުނިކަން އަންނަ ވާހަކަތައް ނުދެއްކުމަށް އެ ކޮމިޝަނުން އިލްތިމާސްކުރި އެވެ.
ކޮމެންޓު ފޮނުވާ