ބޭންކް އޮފް މޯލްޑިވްސް (ބީއެމްއެލް) އާއި ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ގައުމީ ފުޓްބޯޅަ ޓީމުތަކުގެ 3 އަހަރުގެ ސްޕޮންސާޝިޕް އެއްބަސްވުމެއްގައި ސޮއިކޮށްފި އެވެ. މި އެއްބަސްވުމުގެ ދަށުން ބީއެމްއެލްއަކީ ގައުމީ ފިރިހެން، އަންހެން އަދި ޔޫތު ޓީމުތަކުގެ އެކްސްކްލޫސިވް ސްޕޮންސަރެވެ.
އެއްބަސްވުމުގައި ބީއެމްއެލްގެ ފަރާތުން ސީއީއޯ އަދި މެނޭޖިންގ ޑިރެކްޓަރ މުޙައްމަދު ޝަރީފް ސޮއިކުރެއްވި އިރު، އެފްއޭއެމްގެ ފަރާތުން ރައީސް އަޙްމަދު ތާރިޤް ސޮއިކުރެއްވި އެވެ. މި ފުރުސަތުގައި ޝަރީފް ވިދާޅުވީ ރާއްޖޭގެ ގައުމީ ޓީމުތަކުގެ ރަސްމީ ސްޕޮންސަރަކަށް ގައުމީ ބޭންކް ހަމަޖެހިގެން ދިޔުމަކީ ލިބޭ ފަޚުރެއް ކަމަށެވެ. "ރާއްޖޭގައި ކުޅިވަރުގެ ހުނަރު ކުރިއެރުވުމަށް އެހީތެރިވުމަކީ އަޅުގަނޑުމެން ވަރަށް ބޮޑު އަހުމިއްޔަތުކަމެއް ދޭ ކަމެއް. ގައުމީ ފުޓްބޯޅަ ޓީމުތަކަށް އެހީތެރިކަން ފޯރުކޮށްދީ، އަންނަން އޮތް ޖީލުތަކާ ހަމައަށް ފުޓްބޯޅައިން އުއްމީދީ ތަސައްވުރެއް ގެނެސްދިނުމަކީ އަޅުގަނޑުމެންގެ އުންމީދު،" ޝަރީފް ވިދާޅުވި އެވެ.
އެފްއޭއެމްގެ ރައީސް ތާރިޤް ވިދާޅުވީ ބީއެމްއެލްއިން ޕާޓްނާޝިޕެއް ގާއިމުކުރަން ނިންމުމަކީ ދިވެހި ފުޓްބޯޅަ އާލާކުރުމަށް ކުރަމުންދާ މަސައްކަތްތަކަށް ބޭންކުން ކުރާ އިތުބާރު ހާމަކޮށްދޭ ކަމެއް ކަމަށެވެ. މި ޕާޓްނާޝިޕްގެ ސަބަބުން ގައުމީ ޓީމުތަކަށް އެހީތެރިކަން ލިބުމުގެ އިތުރުން މުޅި ރާއްޖޭގައި ފުޓްބޯޅަ ތަރައްގީކުރުމަށް މަގުފަހިވެގެންދާނެ ކަމަށް ތާރިގު ވިދާޅުވި އެވެ. ބީއެމްއެލްއަކީ ގިނަ އަހަރުތަކެއްގައި ރާއްޖޭގެ ފުޓްބޯޅައަށް އެހީތެރިވެދީ ގައުމީ ޓީމުތައް ސްޕޮންސަރކޮށްދީފައިވާ ބޭންކެކެވެ.
ކޮމެންޓު ފޮނުވާ