މިދިޔަ މަހުގެ 15 ވަނަ ދުވަހުން ފެށިގެން މިހާތަނަށް ބަޔޯމެޓްރިކްސް ނުދީ ތިބި 509 ބިދޭސީން ރާއްޖެއިން ޑީޕޯޓްކޮށްފައިވާކަމަށް މިނިސްޓަރ އޮފް ހޯމްލޭންޑް ސެކިއުރިޓީ އެންޑް ޓެކްނޮލޮޖީ އަލީ އިހުސާން ވިދާޅުވެއްޖެއެވެ.
ހޯމްލޭންޑް މިނިސްޓްރީގެ ދަށުން ހިންގަމުންދާ އިދާރާތަކުގެ މަސައްކަތްތައް ހިއްސާކުރުމަށް މިއަދު ބޭއްވި ނޫސްވެރިންގެ ބައްދަލުވުމުގައި މިނިސްޓަރު ވިދާޅުވީ، އޮޕަރޭޝަން ކުރަނގީގެ ދެ ފިޔަވަހީގެ ދަށުން މިހާތަނަށް 202،000 ބިދޭސީންގެ 10 އިނގިލީގެ ނިޝާނާއި ފޭސް ރިކޮގްނިޝަން ނަގާފައިވާ ކަމަށެވެ. އަދި މި ދެ އަހަރުގެ ތެރޭގައި 9697 ބިދޭސީން ޑީޕޯޓްކޮށްފައިވާކަމުގައި އިހުސާން ފާހަގަކުރެއްވިއެވެ.
މިނިސްޓަރު ހާމަކުރެއްވި ގޮތުގައި، ބިދޭސީންގެ މައުލޫމާތު އެއްކުރުމުގެ މަސައްކަތުގެ ތިންވަނަ ފިޔަވަހީގެ ދަށުން އަންނަ ޖެނުއަރީން ފެށިގެން އެޕްރީލްއާ ހަމައަށް ގަވާއިދާ ހިލާފަށް އުޅޭ ބިދޭސީންނަށް ސައްހަ ވޯކް ޕާމިޓް ހޯދުމުގެ ފުރުސަތު ދިނުމަށް ވަނީ ހަމަޖެހިފައެވެ. މި އޮޕަރޭޝަންގެ ފަހު ފޭސް ކުރިއަށްދާނީ 2025 ވަނަ އަހަރުގެ އެޕްރީލް ދެވަނަ ދުވަހުން ފެށިގެން 2027 ވަނަ އަހަރުގެ މެއި މަހާ ހަމައަށެވެ. އެ ވަގުތާ ހަމައަށް ރާއްޖޭގައި ގަވާއިދާ ހިލާފަށް އުޅޭ ބިދޭސީން ހަޔަރުކޮށް ޑީޕޯޓްކުރުމުގެ މަސައްކަތް ފެށިގެންދާނެ ކަމަށްވެސް މިނިސްޓަރު ވިދާޅުވިއެވެ.
ކޮމެންޓު ފޮނުވާ