ރައީސް ޑރ. މުހައްމަދު މުއިއްޒުގެ ވައުދުފުޅާ އެއްގޮތަށް ނުކުޅެދުންތެރިކަން ހުންނަ ފަރާތްތަކަށް ވަޒީފާ ހަމަޖެއްސުމުގެ ގޮތުން ސްޓެލްކޯއިން 30 މީހަކަށް ވަޒީފާގެ ފުރުސަތު ހަމަޖައްސައިދީފި އެވެ.
މި މުވައްޒަފުންނަށް ވަޒީފާގެ ލިޔުން ހަވާލުކުރުމަށް މިއަދު ބޭއްވި ރަސްމިއްޔާތު ޝަރަފުވެރިކޮށް ދެއްވީ ރައީސުލްޖުމްހޫރިއްޔާގެ އަނބިކަނބަލުން ސާޖިދާ މުހައްމަދެވެ. މި ރަސްމިއްޔާތުގައި ސޯޝަލް އެންޑް ފެމިލީ ޑިވެލޮޕްމަންޓް މިނިސްޓަރު ޑރ. އާއިޝަތު ޝިހާމް އާއި ސްޓެލްކޯގެ އިސްވެރިން ބައިވެރިވެވަޑައިގެންނެވި އެވެ.
މެޑަމް ސާޖިދާ ވިދާޅުވީ ނުކުޅެދުންތެރިކަން ހުންނަ ފަރާތްތައް ވަޒީފާގެ މާހައުލަށް ނެރުމަކީ އެ މީހުންގެ ސިއްހަތާއި މާލީ ފުދުންތެރިކަމާއި ނަފްސާނީ ދުޅަހެޔޮކަމަށް ފައިދާ ކުރާނެ ކަމެއް ކަމަށެވެ.
ސްޓެލްކޯގެ އެމްޑީ އަހުމަދު ޝަމާހް ރަޝީދު ވިދާޅުވީ މި 30 މުވައްޒަފުންނާއެކު ކުންފުނީގައި ނުކުޅެދުންތެރިކަން ހުންނަ މުވައްޒަފުންގެ އަދަދު 80 އަށް އެރީ ކަމަށެވެ. އެ ފަރާތްތައް ހަވާސާ ނުކޮށް މުޖުތަމައުގެ މުހިންމު ބައެއްގެ ގޮތުގައި ފެނުމަކީ އެންމެން އުފާކުރާ ކަމެއް ކަމަށް ވެސް ވިދާޅުވި އެވެ.
އަލަށް ގުޅުނު މުވައްޒަފުން ހޮވާފައިވަނީ ސްޓެލްކޯއިން ހިދުމަތް ދޭ 21 ރަށަކުންނެވެ. އެ މީހުން ޓެކްނިކަލް އަދި ނޮންޓެކްނިކަލް ދާއިރާތަކުގައި ހިދުމަތްކުރާނެ އެވެ.
ކޮމެންޓު ފޮނުވާ