ލ. ގަމު ސެންޓްރަލް ޕަވަރ ހައުސްގައި އިއްޔެ މެންދުރުފަހު ހިނގި އަލިފާނުގެ ހާދިސާގައި ބޭނުން ނުކުރެވޭ ވަރަށް ހަލާކުވި ބާ އިމާރާތުގެ ބަދަލުގައި މުޅިން އައު އިމާރާތެއް އެޅުމަށް ފެނަކަ ކޯޕަރޭޝަނުން ނިންމައިފިއެވެ.
ފެނަކައިގެ މެނޭޖިން ޑިރެކްޓަރ މުޙައްމަދު ނަޖާހް ވިދާޅުވި ގޮތުގައި، މި މަސައްކަތް ކުރިއަށް އޮތް ހަފްތާ ބަންދުގައި ފެށި، ރަމަޟާން މަހުގެ ކުރިން ނިންމާލެވޭނެއެވެ. އެކަމަށްޓަކައި ފެނަކައިގެ ޓީމްތައް ގަމަށް ދާނެއެވެ.
ނަޖާހް ވިދާޅުވީ އަލިފާނުގެ ސަބަބުން އެންމެ ބޮޑު ގެއްލުމެއް ލިބުނީ އިމާރާތަށް ކަމަށާއި، ރޯވިއިރު އެތަނުގައި ހިންގަމުންދިޔަ ދެ އިންޖީނުގެ ތެރެއިން އެއް އިންޖީނަށް އެއްވެސް ގެއްލުމެއް ނުލިބޭ ކަމަށެވެ. އަނެއް އިންޖީނަށް ލިބުނު ކުދި ގެއްލުންތައް މިހާރު ވަނީ ގާތްގަނޑަކަށް ހައްލުކޮށްފައެވެ.
މި ހާދިސާގައި ބައެއް ކޭބަލްތަކަށް ވެސް ގެއްލުންވެފައިވާތީ އެތަކެތި ބަދަލުކުރުމުގެ މަސައްކަތް ކުރިއަށްދާއިރު، ގަމުގެ ތިން އަވަށުން ކެނޑުނު ކަރަންޓު ރޭގެ ވަގުތެއްގައި ވަނީ އިޔާދަކޮށްފައެވެ. މި ހާދިސާ ހިނގި ސަބަބު ދެނެގަތުމަށް ފުލުހުންނާއި އެމްއެންޑީއެފް ގުޅިގެން ދަނީ ތަހުގީގު ކުރަމުންނެވެ.
ކޮމެންޓު ފޮނުވާ