ލ. ގަމު އިންޖީނުގޭގައި ރޯވެ މުޅި ރަށް އަނދިރީގައި

ލ. ގަމު ފެނަކަ އިންޖީނުގޭގައި މިއަދު މެންދުރުފަހު 2:45 ހާއިރު އަލިފާނުގެ ހާދިސާއެއް ހިނގައި، ފަސް ހާހެއްހާ މީހުން ދިރިއުޅޭ އެ ރަށުން އެއްކޮށް ކަރަންޓު ކެނޑިއްޖެއެވެ.

އިންޖީނުގޭގައި ތިބި މުވައްޒަފުންނާ ހަވާލާދީ ގަމު ކައުންސިލްގެ ރައީސް އަޙްމަދު ޒަކީ ވިދާޅުވީ އަލިފާން އެންމެ ފުރަތަމަ ހިފީ ދުންހޮޅީގައި ކަމަށާއި، އެތެރެއިން ކޮންޓްރޯލް ކުރަން މަސައްކަތް ކޮށްގެން ވެސް ކާމިޔާބު ނުވީ ކަމަށެވެ. ފުލުހުން ބުނީ އަލިފާން ނިއްވާލެވުނީ 15:50 ހާއިރު ކަމަށެވެ.

މި ހާދިސާގައި އިންޖީނުގޭގެ ސީލިންގު އެއްކޮށް އަނދައި، އެއް ޖަނަރޭޓަރު ބޭނުން ނުކުރެވޭ ވަރަށް ހަލާކުވެފައިވީ ނަމަވެސް، އެއްވެސް މީހަކަށް އަނިޔާއެއް ނުވެއެވެ. ފެނަކައިން ބުނީ މިރޭ 12:00އާ ހަމައަށް މުޅި ރަށަށް ކަރަންޓު ދިނުމަށް މަސައްކަތް ކުރަމުން އަންނަ ކަމަށެވެ.