މޯލްޑިވްސް ހަލާލް ޓްރެވެލް ބްރޭންޑުގެ ދަށުން ޓްރެވަލް ދާއިރާގެ ޚަބަރުތައް ގެނެސްދޭ މީޑިއާގައި އިސްކޮށް ހަރަކާތްތެރިވި ޑރ. ހުސައިން ސަނީ އުމަރު، ކުޑަކުއްޖަކަށް ޖިންސީ ގޯނާކުރި ކަމުގެ ތުހުމަތުގައި ކޯޓު އަމުރެއްގެ ދަށުން މިއަދު އަލުން ހައްޔަރުކޮށްފިއެވެ.
އިންޑިއާގެ ނިއުދިއްލީގައި ހުރެފައި އިއްޔެ ސަނީ ރާއްޖެ އައުމާއެކު، ފުލުހުންގެ ފެމިލީ އެންޑް ޗައިލްޑް ޕްރޮޓެކްޝަން ޔުނިޓަށް ހާޒިރުކޮށް ސުވާލުކުރިއެވެ. އެއަށްފަހު ދޫކޮށްލުމުން، ފިލައިގެން ރާއްޖެއިން ބޭރަށް ފުރަން އެއާޕޯޓުގައި ހުއްޓާ އޭނާ ހައްޔަރުކުރިއެވެ.
މީޑިއާ ރިޕޯޓުތައް ބުނާގޮތުން ސަނީ ވަނީ އޭނާގެ އަނބިމީހާގެ އާއިލާގެ 18 އަހަރުން ދަށުގެ ދެ ކުދިން ހިމެނޭހެން ތިން ކުއްޖަކަށް ޖިންސީ ގޯނާކޮށްފައެވެ. މި ތުހުމަތުތަކާ ގުޅިގެން ސަނީ ނިސްބަތްވާ ދަ ޓްރެވަލް ގާއިސް ކުންފުނިން ބުނީ، މިއީ އެ ކުންފުނިން ބަލައިގަންނާނެ އަމަލުތަކެއް ނޫން ކަމަށާއި، މައްސަލަ ތަހުގީގުކުރުމުގައި ކަމާބެހޭ ފަރާތްތަކަށް ފުރިހަމައަށް އެއްބާރުލުން ދޭނެ ކަމަށެވެ.
ކޮމެންޓު ފޮނުވާ