އެމްޑީޕީގެ ޗެއާޕާސަން ފައްޔާޒު އިސްމާއިލް އެ މަގާމުން މިއަދު އިސްތިއުފާ ދެއްވައިފިއެވެ. މިރޭ ބޭއްވި ގައުމީ މަޖިލިހުގެ ބައްދަލުވުން ނިންމަވާލައްވަމުން ފައްޔާޒު ވަނީ ޗެއާޕާސަންގެ މަގާމުން އިސްތިއުފާ ދެއްވާފައިވާކަން އިއުލާން ކުރައްވައިފައެވެ.
2022 ވަނަ އަހަރު އެމްޑީޕީގެ ޗެއާޕާސަންގެ މަގާމަށް އިންތިހާބުވެ ވަޑައިގެންނެވި ފައްޔާޒު މި އަހަރުގެ ޖޫން 25 ގައި ވަނީ 2028 ގެ ރިޔާސީ އިންތިހާބުގައި އެމްޑީޕީގެ ޕްރައިމަރީގައި ވާދަކުރައްވާނެކަން އިއުލާން ކުރައްވައިފައެވެ. އެގޮތުން ޕްރައިމަރީގައި ވާދަކުރާ ހުރިހާ ކެންޑިޑޭޓުންނަށް ހަމަހަމަ ފުރުސަތު ހޯދައިދެއްވުމުގެ ގޮތުން ފައްޔާޒު އިސްތިއުފާ ދެއްވީކަމަށް ބައެއް ނޫސްތަކުން ރިޕޯޓްކޮށްފައިވެއެވެ.
އެމްޑީޕީގެ ތެރޭގައި 2028 ގެ ރިޔާސީ އިންތިހާބަށް ތައްޔާރުވުމުގެ ހަރަކާތްތައް މިހާރުވެސް ފެށިފައިވާއިރު، އަންނަ އަހަރުގެ ލޯކަލް ކައުންސިލް އިންތިހާބަށް ތައްޔާރުވުމުގެ މަސައްކަތްވެސް ވަނީ ފުޅާ ވެފައެވެ.
ފައްޔާޒް އެމްޑީޕީގެ ޗެއަރޕާސަންކަމުގެ މަގާމުން އިސްތިއުފާ ދެއްވިއިރު މާލޭ ސިޓީގެ މޭޔަރު ކަމަށް އެމްޑީޕީގެ ޓިކެޓުގައި މިހާރުގެ މޭޔަރު އާދަމް އާޒިމާއި ކުރީގެ މަޖިލިސް މެމްބަރު އަލީ އާޒިމް ވާދަކުރައްވަން ކެމްޕެއިން ކުރައްވަން މިހާރު ވަނީ ފައްޓަވާފައެވެ. ފައްޔާޒު ތާއީދު ކުރައްވަނީ އަލީ އާޒިމްއަށެވެ.
ކޮމެންޓު ފޮނުވާ