ޤާނޫނާއި ޚިލާފަށް ރާއްޖެއަށް އެތެރެކޮށްފައިވާކަމުގެ ތުހުމަތުގައި ފުލުހުންގެ ބެލުމުގެ ދަށުގައި ހުރި ސިނގިރޭޓި ކާޓަންތަކެއް ގެއްލުނު މައްސަލައެއް ފުލުހުން ތަޙުޤީޤު ކުރަމުންދާ ކަމަށް މޯލްޑިވްސް ޕޮލިސް ސަރވިސްއިން މިއަދު ވަނީ ހާމަކޮށްފައެވެ. މިތަކެތި ބަހައްޓާފައި ހުރީ ވިލިމާލޭ ޕޮލިސް ސްޓޭޝަނުގައެވެ.
ފުލުހުން މީޑީއާތަކާއި ހިއްސާކުރެއްވި މެސެޖެއްގައި ވިދާޅުވީ، ޤާނޫނާއި ޚިލާފަށް އެތެރެކުރިކަމަށް ތުހުމަތުކުރެވޭ ޖުމްލަ 32 ކާޓަން ސިނގިރޭޓި ފުލުހުންގެ ބެލުމުގެ ދަށަށް ގެންގޮސްފައިވާ ކަމަށެވެ. މިތަކެއްޗަކީ މިއަހަރުގެ މެއި މަހުގެ 23 ވަނަ ދުވަހު ބިދޭސީއެއްގެ އަތުން ނެގި ތަކެތި ކަމަށް ފުލުހުން ވިދާޅުވިއެވެ.
މިތަކެތީގެ ތެރެއިން 6 ކާޓަން މަދުވި މައްސަލައެއް ފެންމަތިވެފައިވާކަން ފުލުހުން ވަނީ ކަށަވަރުކޮށްދީފައެވެ. މިތަކެތި މަދުވިކަން އެނގުނީ، އޮންނަ އުސޫލުގެ ތެރެއިން މިތަކެތި ކަސްޓަމްސްއާއި ހަވާލުކުރުމަށް މިމަހުގެ 12 ވަނަ ދުވަހު ބެލި ބެލުމުންނެވެ.
ފުލުހުންގެ ބެލުމުގެ ދަށުގައި ހުރި ތަކެތި ގެއްލުމަކީ ސީރިއަސް މައްސަލައެއް ކަމަށް ބެލެވޭއިރު، މިކަމާ ގުޅިގެން މިހާރު ތަހުޤީޤު ކުރިއަށްދާ ކަމަށް ފުލުހުން ވިދާޅުވިއެވެ. މި މައްސަލައާބޭހޭ އިތުރު ތަފްސީލެއް ފުލުހުން އަދި ހާމަކޮށްފައެއް ނުވެއެވެ.
ކޮމެންޓު ފޮނުވާ