ސްރީލަންކާގެ ނޭވީން 355 ކިލޯގެ މަސްތުވާތަކެއްޗާއެކު އަތުލައިގަތް ބޯޓަކީ ރާއްޖޭގެ ސަރަހައްދުން މަސްތުވާތަކެތި ބަރުކުރި ބޯޓެއް ނޫންކަމަށް ދިވެހި ފުލުހުން މިއަދު ސާފުކޮށްދެއްވައިފިއެވެ. މި ބޯޓު ރާއްޖެއާ ގުޅިފައިވާކަމަށް އަޑުފެތުރެމުންދިޔަ ނަމަވެސް، ސްރީލަންކާގެ ރަސްމީ އިދާރާތަކުން ދިވެހި ފުލުހުންނަށް އެކަން ކަށަވަރުކޮށްދީފައިވާކަމަށް ފުލުހުން ބުންޏެވެ.
ސްރީލަންކާ ނޭވީން ހިންގި ޚާއްޞަ އޮޕަރޭޝަނެއްގައި އެ ގައުމުގެ ހުޅަނގު ކަނޑުގައި މަސްދޯންޏަކާއި 6 މީހުން ހައްޔަރުކޮށްފައިވާއިރު، އެ ބޯޓުގައި 250 ކިލޯއަށްވުރެ ގިނަ އައިސް އަދި 85 ކިލޯއަށްވުރެ ގިނަ ހެރޮއިން ފެނިފައިވެއެވެ. ނޮވެމްބަރު 2 ވަނަ ދުވަހު މި ބޯޓު ޑިކޮވިޓާ ފިޝަރީޒް ހާބަރަށް ގެނެސް، އެ ގައުމުގެ ދިފާއީ ނައިބު ވަޒީރާއި ނޭވީ ކޮމާންޑަރު ބެލުމުގެ ފުރުޞަތު ވަނީ ދެއްވައިފައެވެ.
މި ފުރުޞަތުގައި ދިފާއީ ނައިބު ވަޒީރު މޭޖަރ ޖެނެރަލް އަރުނާ ޖަޔަސޭކަރާ ވަނީ މަސްތުވާތަކެތީގެ ވިޔަފާރިއާ ދެކޮޅަށް ލަންކާ ސަރުކާރުން ކުރާ ހަނގުރާމަ އިތުރަށް ހަރުދަނާކުރަމުންދާ ކަމަށް ވިދާޅުވެ، މަސްތުވާތަކެތި ވިޔަފާރިކުރާ ފަރާތްތަކަށްވަނީ އިންޒާރުދެއްވާކަމަށެވެ.
ކޮމެންޓު ފޮނުވާ