ނަޞްރުގެ ދުވަހުގެ މުނާސަބަތުގައި ބޭއްވި ޖަލްސާގައި ވާހަކަދައްކަވަމުން ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވީ މިޒަމާނުގައި ގައުމެއްގެ މިނިވަންކަން އަތުލައިގަތުމަށްޓަކައި ކުރީ ޒަމާނެކޭ އެއްގޮތަށް ހަތިޔާރު ހިފައިގެން ނުކުންނާކަށް ނުޖެހޭ ކަމަށެވެ. މިހާރު މިކަންކަން ކުރެވެނީ ޓެކްނޮލޮޖީ ބޭނުންކޮށްގެންނާއި އިޤްތިޞާދީ ހަމަލާތަކުންނާއި މީސް މީޑިއާގެ ޒަރިއްޔާއިން ކަމަށް އެމަނިކުفާނު ފާހަގަކުރެއްވިއެވެ.
ނޮވެންބަރު 3 ވަނަ ދުވަހުގެ ހާދިސާގެ ޝަހީދުންގެ ހަނދާން އާކުރައްވަމުން ރައީސް ވަނީ ގައުމަށްޓަކައި ޤުރުބާންވުމަކީ ހަމައެކަނި ސިފައިންނާއި ފުލުހުންގެ ޔުނިފޯމުގައި ތިބެގެން ކުރެވޭ ކަމެއް ނޫން ކަމަށް ވިދާޅުވެފައެވެ. ނޭނގިތިއްބާ ދިވެހިވަންތަކަމާއި އިސްލާމްދީނަށް ތަބާވެތިބޭ ބަޔަކުކަމާއި އެއްބަހަކުން ވާހަކަދައްކައި އެއް ނަސްލަކަށް ނިސްބަތްވާ ބަޔަކުކަން ގެއްލުވާލެވިދާނެކަމުގެ އިންޒާރު އެމަނިކުފާނު ދެއްވިއެވެ. މިފަދަ ހަމަލާތަކުން ސަލާމަތްވުމަށްޓަކައި ކޮންމެ ދިވެހި ރައްޔިތެއްގެ ވެސް ޒިންމާއެއް އެބައޮތް ކަމަށާއި، އެންމެ ބާރުގަދަ ހަތިޔާރުކަމަށްވާ ސިކުނޑި ބޭނުންކޮށްގެން ގައުމަށްޓަކައި މަސައްކަތްކުރުމަށް އެމަނިކުފާނު ގޮވާލެއްވިއެވެ.
ރައީސް މީގެއިތުރުން ވިދާޅުވީ ދިވެހި ގައުމިއްޔަތު ދިރުވައި އާލާކުރުމަށްޓަކައި ގިނަ މަސައްކަތްތަކެއް ކުރަމުންދާ ކަމަށާއި، ގައުމީ ޚިދުމަތަށް ހުޅުވާލި ފުރަތަމަ ފުރުސަތުގައިވެސް ޖާގައަށް ވުރެ ހަތަރު ގުނަ އިތުރު ޒުވާނުން ކުރިމަތިލާފައިވާ ކަމަށެވެ. ކޮންމެ އަހަރަކު 1000 އަށް ވުރެ ގިނަ ޒުވާނުން ތަމްރީނުކުރުމަށް ސަރުކާރުން މަސައްކަތް ކުރަމުންދާކަމަށް އެމަނިކުފާނު ހާމަކުރެއްވިއެވެ.
ކޮމެންޓު ފޮނުވާ