ސައުދީ އަރަބިއްޔާއިން އުމްރާވެރިންނަށް ދޫކުރާ ވިސާގެ ދަށުން އެ ގައުމަށް އެތެރެވެވޭނެ މުއްދަތު ތިން މަހުން އެއް މަހަށް ކުރުކޮށްފި އެވެ. މިއީ އާ އުމްރާ ސީޒަންގައި ވިސާގެ އަދަދު ހަތަރު މިލިއަނަށް ވުރެ އިތުރުވެ، ރިކޯޑު އަދަދަކަށް އަރައި، ދެ ހަރަމްފުޅުގައި ތޮއްޖެހުން ދިމާވެދާނެތީ، ހައްޖާއި އުމްރާ މިނިސްޓްރީން އުމްރާ ވިސާގެ ގަވާއިދަށް ގެނައި އިސްލާހެކެވެ.
ސައުދީ ގެޒެޓުގައި ޝާއިއުކޮށްފައިވާ އާ އިސްލާހުތަކުގެ ދަށުން، މީގެ ކުރިން ވިސާ ދޫކުރާތާ ތިން މަސް ތެރޭގައި ސައުދީއަށް ދެވޭ ގޮތަށް ހުންނަ އިރު، މިހާރު ވިސާ ދޫކުރާތާ އެއް މަސް ތެރޭގައި ސައުދީއަށް ދާން ޖެހޭނެ އެވެ. ނަމަވެސް ސައުދީއަށް އެތެރެވުމަށް ފަހު އެ ގައުމުގައި މަޑުކުރެވޭ މުއްދަތަށް ބަދަލެއް ގެނެސްފައެއް ނުވާތީ، އުމްރާވެރިންނަށް އަދިވެސް ތިން މަސްދުވަހަށް ސައުދީގައި މަޑުކުރެވޭނެ އެވެ.
ނޭޝަނަލް ކޮމިޓީ ފޯ އުމްރާ އެންޑް ވިޒިޓްގެ އެޑްވައިޒަރު އަހުމަދު ބާޖާއިފަރު ވިދާޅުވީ، މި ސީޒަންގައި އުމްރާވެރިންގެ އަދަދު އިތުރުވާނެ ކަމަށް ލަފާކުރެވޭތީ، ގައުމަށް ވަނުމުގެ ކަންކަން ރަނގަޅަށް ބެލެހެއްޓުމަށާއި ހަރަމްފުޅުގައި ތޮއްޖެހުން ހުއްޓުވުމަށް މި ބަދަލު ގެނެސްފައިވާ ކަމަށެވެ.
ކޮމެންޓު ފޮނުވާ